Halli i paraburgimeve apo halli i hetimeve?!

Kryeministri Edi Rama njoftoi publikisht dhjetë ditë më parë, më 30 shtator, ndryshimet në Kodin e Procedurës Penale.

Ndryshime, që, sipas tij, ishin bërë në gati 100 nene dhe, siç deklaroi kryeministri, këto ishin bërë për një hall të madh; çështjen e paraburgimeve në Shqipëri dhe standardeve të larta europiane, pasi askush nuk do të dënohet më për vepra penale që parashikojnë pesë vjet dënim.

Disa muaj më parë, një tjetër debat u hap në Shqipëri në lidhje me Kodin Penal me ekspertë shqiptarë, gjyqtarë, prokurorë, profesionistë të fushës së drejtësisë që e njohin realitetin në vendin tonë, përgatitën një Kod të ri Penal në detaje, i cili ishte edhe ai i diskutueshëm.

Po për Kodin e Procedurës, që filloi menjëherë pas Kodit Penal, nuk u morën më ekspertët tanë, por u “shpikën” disa ekspertë të Këshillit të Europës, profesorë universitetesh dhe lektorë, duke përjashtuar ekspertizën e fakteve dhe realitetit shqiptar. Propaganda e pushtetit na tha se po bëhej një Kod sipas standardeve të BE-së.

Dikush harron t’u thotë shqiptarëve se tjetër është BE-ja dhe tjetër është KE-ja, që përfshin 46 shtete anëtare, 28 prej të cilave janë anëtare të Bashkimit Europian, pra KE nuk është BE.

BE: NDAL Kodit të ri të Procedurës Penale

Dy ditë më parë në Tiranë erdhi Komisioneri Europian për Demokracinë, Drejtësinë, Shtetin e së Drejtës dhe Mbrojtjen e Konsumatorit, Michael McGrath, që zhvilloi një takim me ministrin e Drejtësisë, Toni Gogu, i cili i ka theksuar qëndrimin zyrtar, se BE-ja është e shqetësuar për ndryshimet e përgatitura në Kodin e ri të Procedurës Penale, pasi ato nuk duhet të dëmtojnë institucionet e drejtësisë së re dhe hetimet që bëhen në luftën kundër krimit dhe korrupsionit.

Nga ana tjetër, qeveria ka bërë mbi 100 ndryshime dhe thotë se kemi një Kod të standarteve të BE-së, ndoshta sipas standarteve të Danimarkës apo Finlandës. Por, në fakt, jetojmë në Shqipëri në një realitet tjetër, në vendin ku krimi, droga dhe korrupsioni janë në nivelet më të larta. Jo vetëm në Europë, por krahasuar edhe me shumë vende të tjera të botës.

Ajo që ofrohet nga qeveria është Kod i ri i Procedurës me argumentin se burgjet janë plot dhe s'duhet të paraburgosen njerëz.

Burgjet i mbush qeveria

Në fakt, nga rreth 2200 të burgosur, rreth 1950 janë persona në paraburgim nga hetimet e kryera nga policia dhe me kërkesat e prokurorisë së juridiksionit të përgjithshëm. Kujtojmë urdhrat e Ramës, në burg për çatinë, për energjinë, për ujin, për avllinë, edhe për rakinë.

Vetëm 200-250 persona janë në paraburgimet e Shqipërisë nga SPAK-u për luftën ndaj krimit dhe vetëm një person është nën paraburgim për korrupsion. (LEXO KETU)

Hetimet për korrupsion apo gjykimet për korrupsion, në pjesën më të madhe të tyre shtetas që ndiqen në gjendje të lirë.

Paraburgimi është një hall i policisë pas urdhrave të pushtetit dhe i Prokurorisë së Juridiksionit të Përgjithshëm që ka mbushur burgjet me dosjet e uniformave blu.

Paraburgos për avllinë, për një cigare hashash, se ka vjedhur energjinë, se s'mund të ngrohet dot me fëmijët dhe për vepra penale të tjera ku shumë prej të cilave nuk duhet të kenë farë masë sigurie. Ndaj dhe paraburgimet në Shqipëri janë mbushur plot.

I mbush vullneti i pushtetit me policinë që e ka kthyer në strukturë për të mbushur paraburgimet plot e përplot me shqiptarë për vepra shumë të lehta, shumë prej tyre nuk janë as vepra penale. Mbushen paraburgimet dhe kriminalizohet shoqëria me urdhër të qeverisë.

Këto janë bërë me urdhër të Kryeministrit. Kujtojmë Edi Ramën kur thërriste “burg, burg” për aksidentet, për alkoolin në makinë, për ndërtimet pa leje dhe për vjedhjen e energjisë.

Ata sërish do të bëjnë burg, por thjesht, sipas Ramës, nuk duhet të ketë paraburgim. Pse dje e donte e sot jo?

Halli i paraburgimit apo i hetimit?!

Halli nuk është paraburgimi, sepse po të ishte kështu, Kryeministri do ta merrej vetëm me pjesën e paraburgimit apo masës së sigurisë të përcaktuar në Kodin e Procedurës Penale dhe do ta mbyllte me kaq të gjithë historinë.

Do të thoshte se për masat e sigurimit për këto vepra penale të parashikohet garancia pasurore, ndjekja në gjendje të lirë, masat të tjera sigurie, por jo paraburgim. Dy ndryshime në Kodin e Procedurës dhe për 28 orë çështja zgjidhej.

Kryeministri nuk ka bërë këtë, as “ekspertët” europianë, të cilët nuk vijnë nga BE-ja, sepse po të ishin të këtij institucioni, nuk do të vinte Komisioneri për drejtësinë e Bashkimit Europian, dhe të shqetësohej për çështjen dhe BE-ja nuk do të vihej në alarm, por do ta mbështesin.

Në fakt, është një Kod i ri i Procedurës Penale që nuk merret në thelb me paraburgimet apo masën e sigurisë, por shkatërron hetimin.

Jo vetëm hetimin që bëhet nga Prokuroria e Juridiksionit të Përgjithshëm, por edhe hetimet që bëhen nga SPAK-u, për korrupsionin dhe krimin e organizuar, pra për veprat penale që janë kompetencë ligjore e SPAK-ut.

Ky është halli i mbi 100 ndryshimeve në Kodin e ri të Procedurës Penale.

Janë ndryshuar mbi 100 nene, të cilat kufizojnë mënyrën e hetimit. Dhe nga ana tjetër, kjo ka një qëllim.

Qëllimi është të mbrohet korrupsioni, të mbulohet krimi sepse SPAK-u u ka hyrë me themel shumë çështjeve të korrupsionit e krimit dhe Kryeministri ynë e mazhoranca ndihen të shqetësuar. 

Dikujt po i vjen radha!

Por çështja nuk është nëse Kodi i ri i Procedurës Penale u pëlqen apo jo prokurorëve apo gjyqtarëve.

Çështja është, a do të mundet Rama të marrë në mbrojtje hajdutët e pushtetit të tij dhe të ndryshojë Kodin e Procedurës Penale, gjoja me justifikimin e paraburgimit?

Halli nuk është paraburgimi, halli është hetimi.

Dhe ndryshimet në Kodin e Procedurës Penale kanë një qëllim final, të mbyllet “qepeni” i SPAK-ut.

Me ato ndryshime dhe propozime të bëra nga ekspertë dhe profesorë të huaj të jurisprudencës, që nuk e njohin aspak realitetin shqiptar, dhe që na japin një Kod të ri Procedure, thuajse si të Finlandës apo Danimarkës, ndoshta edhe atje të pazbatueshëm, duan të krijojnë një realitet tjetër, atë të mbrojtjes të krimit dhe korrupsionit duke kufizuar hetimin, dhe ky është halli.

Halli është hetimi dhe jo paraburgimi.

Po të kishin paraburgimin me një nen të ndryshuar te masa e sigurisë, do ta kishin zgjidhur, por nuk kanë atë qëllim.

Qëllim kanë të dëmtojnë hetimet, të pengojnë hetimet, të mbrojnë korrupsionin, të mbrojnë dhe krimin.

Ky është qëllimi dhe në finale, siç e theksuam më lart, t'i mbyllin qepenin SPAK-ut./ CNA