Deputeti socialist Erion Braçe ka shpjeguar arsyet që e çuan të votonte pro reformës territoriale, pavarësisht kundërshtive që kishte shprehur më herët për projektin. Në një reagim të gjatë, Braçe i është përgjigjur kryeministrit Edi Rama, duke kundërshtuar deklaratat e tij për ndikime të jashtme në vendimin e deputetit dhe duke ngritur kritika për mënyrën se si ushtrohet pushteti brenda Partisë Socialiste.
Braçe thekson se vota e tij nuk ishte rezultat i presionit apo ndikimit të askujt. Ai i ka kërkuar Ramës të sqarojë se kujt i referohej kur foli për “duar të pista, ca të dukshme e ca të padukshme”, që sipas kryeministrit kishin ndikuar në qëndrimin e tij.
Deputeti socialist rikujton se e ka kundërshtuar projektin për ndarjen administrative dhe territoriale, pasi, sipas tij, ai nuk përbën një reformë të mirëfilltë, por vetëm një rishikim të hartës territoriale, pa garanci për ndryshime thelbësore në funksionimin e pushtetit vendor.
“Votova që të mos iki, por të qëndroj”, shprehet Braçe, duke argumentuar se vendimi lidhet me përgjegjësinë që ndien ndaj rreth 25 mijë qytetarëve që e kanë votuar në listën e hapur. Sipas tij, mandati i deputetit është një punë që ia kanë besuar zgjedhësit dhe nuk mund të zhvlerësohet përmes presionit politik.
Në reagimin e tij, Braçe kritikon edhe mënyrën se si funksionon disiplina brenda PS-së, duke e cilësuar atë një deformim antidemokratik kur përdoret për të imponuar qëndrime politike. Ai kundërshton logjikën se deputetët duhet të votojnë sipas vullnetit të shumicës së grupit, përndryshe rrezikojnë përjashtimin.
Një tjetër kritikë e drejtpërdrejtë i drejtohet vetë Ramës dhe mënyrës se si ai ushtron pushtetin. Braçe thotë se kryeministri duhet të marrë përgjegjësi për gabimet e bëra gjatë qeverisjes, në vend që t’ua atribuojë ato vetëm personave që ka pasur përreth.
“Ai është i dashuruar me pushtetin, fuqinë e autoritetin që ai jep”, shprehet Braçe, duke shtuar se Rama e ka përdorur pushtetin si për të sjellë ndryshime pozitive, ashtu edhe në raste kur, sipas tij, ai është shpërdoruar nga ministra dhe drejtues të papërshtatshëm.
Sa i përket reformës territoriale, deputeti nënvizon se ndryshimi i hartës nuk mjafton pa një riorganizim real të pushtetit vendor. Ai kërkon transferimin e kompetencave, funksioneve, buxheteve, të ardhurave dhe pronave nga qeveria qendrore te bashkitë, duke e lidhur këtë proces me decentralizimin dhe autonominë financiare.
Në përfundim, Braçe këmbëngul se vota e tij synonte t’i jepte mundësi të vijonte punën si deputet dhe të përfaqësonte qytetarët që i kanë besuar mandatin, ndërsa shpreh keqardhje për banorët e bashkive të prekura nga ndryshimi territorial.
