Artistët që shfaqen në video intime në internet kanë nisur ankesat pranë Autoritetit të Mediave Audiovizive për fshirjen e tyre nga platformat digjitale. Kryetarja e AMA-s, Armela Krasniqi, tha se pas apelit nga emisioni Tech Talk në Top Channel, reagimi ishte i menjëhershëm. Mes dhjetëra ankesave, nëpërmjet bashkëpunimit me TikTok janë arritur të bllokohen 45 linqe.
Pas apelit publik që u bë nga emisioni Tech Talk, ne në fakt patëm fluks ankesash, të cilat vinin nga qytetarë, nga artistë të prekur, edhe nga shoqëri civile, nga disa organizata, u shpreh Krasniqi.
Nëse nga shkurti deri në fillim të tetorit kemi administruar në institucion 326 ankesa, nga të cilat 140 janë gjetur në shkelje dhe platforma ka hequr 112, për rastin në fjalë vetëm gjatë kësaj jave janë përpunuar 54 ankesa, të gjitha në shkelje të legjislacionit dhe kodit të transmetimit, edhe për këtë arsye i jemi drejtuar TikTok-ut, që ka hequr deri në momentin që flasim 45 të tilla dhe 9 të tjera janë ende në shqyrtim.
Ndonëse ka boshllëk ligjor për monitorimin e platformave digjitale, Autoriteti i Mediave ka ndërmarrë nismë vullnetare në bashkëpunim me TikTok-un për fshirjen e materialeve të papërshtatshme në cenim të privatësisë, që shkaktojnë bullizëm apo fenomene të rënda sociale. AMA fton për ankesa në faqen zyrtare.
