Një aksion i përbashkët i Ministrisë së Punëve të Brendshme dhe Ministrisë së Politikës Sociale, Demografisë dhe Rinisë ka nisur më 1 tetor për të trajtuar në mënyrë të organizuar lëmoshëkërkimin në rrugët e Shkupit.
Të lidhura
None found
Ministri i Brendshëm, Pançe Toshkovski, deklaroi se po shqyrtohet mundësia që pas kësaj dukurie të fshihet një grup kriminal. Nëse dyshimet konfirmohen, personat përgjegjës do të përballen me kallëzime penale.
Gjatë një interviste në podkastin “Në grindje me Ivanin” të televizionit Kanal 5, Toshkovski tha se institucionet po veprojnë ndaj individëve që kërkojnë lëmoshë në kryqëzime. Dyshime të veçanta kanë ngritur rastet kur persona të moshuar shfaqen në të njëjtat zona me turne, çka mund të tregojë për një organizim të tillë.
Ministri theksoi se ndaj atyre që rrezikojnë sigurinë e komunikacionit do të zbatohen masat e parashikuara me ligj. Nëse vërtetohet se janë pjesë e grupeve kriminale, ndaj tyre do të ngrihen edhe kallëzime penale.
Prioritet i këtij aksioni janë fëmijët që mund të jenë duke u shfrytëzuar. Të miturit e gjetur në terren dërgohen fillimisht për ekzaminim mjekësor në Klinikën e Fëmijëve në Kozle, ndërsa për strehimin e tyre vendosin qendrat për punë sociale.
Për strehimin e tyre është vënë në dispozicion një pjesë e objektit “25 Maji”, në komunën e Butelit, ku deri tani janë vendosur dy fëmijë. Ndërkohë, ekipet përgjegjëse po kryejnë kontrolle të përditshme në kryqëzimet e kryeqytetit.
