Arrestohet 51-vjeçarja gjermane në Kakavijë, në automjet iu gjetën armë dhe kanabis
Policia Kufitare e Kakavijës ka finalizuar operacionin e koduar “Risku 2”, gjatë të cilit janë sekuestruar një armë zjarri pistoletë me mulli, municion dhe 141 gramë lëndë e dyshuar narkotike kanabis. Në pranga ka rënë drejtuesja e automjetit, një shtetase gjermane 51-vjeçare.
Operacioni u zhvillua në kuadër të kontrolleve të intensifikuara në pikën kufitare të Kakavijës, me qëllim parandalimin dhe goditjen e tentativave për trafikimin e lëndëve narkotike dhe armëve.
Sipas Policisë, automjeti dhe ruloti që drejtohej nga shtetasja gjermane me inicialet A. S. iu nënshtruan kontrollit të detajuar në skaner dhe më pas në vijën e dytë, në dalje të pikës kufitare.
Gjatë kontrollit, shërbimet zbuluan një armë zjarri pistoletë me mulli, së bashku me municionin përkatës, si dhe gjashtë kavanoza dhe tri qese hermetike me lëndë të dyshuar narkotike kanabis, me peshë totale rreth 141 gramë.
Në vijim të veprimeve hetimore, specialistët për Hetimin e Narkotikëve në Drejtorinë Vendore të Policisë Gjirokastër arrestuan në flagrancë 51-vjeçaren.
Në cilësinë e provës materiale u sekuestruan arma e zjarrit dhe municioni, lënda e dyshuar narkotike Cannabis Sativa, automjeti së bashku me rulotin, si dhe një telefon celular.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme për veprat penale të dyshuara të “Trafikimit të narkotikëve” dhe “Trafikimit të armëve dhe municioneve”.
