Investimet për përmirësimin e infrastrukturës arsimore po vijojnë në vend, me synimin për të krijuar ambiente mësimore sipas standardeve europiane.

Kryeministri Edi Rama ka ndarë sot pamje nga projektet për rikonstruksionin e shkollës “Skënderbej” dhe për përmirësimin e ambienteve sportive në gjimnazin “Oso Kuka”, në Shkodër.

Përmes një reagimi, Rama bëri të ditur se në të gjithë vendin janë parashikuar 39 investime të reja në shkolla, të cilat do të financohen nga qeveria pas hartimit të projekteve përkatëse nga bashkitë.

“Edhe 39 investime të reja për shkollat tona, nga veriu në jug, të cilat, pas hartimit të projekteve nga bashkitë, do të financohen nga qeveria shqiptare”, u shpreh kryeministri.

Sipas Ramës, investimet e reja i shtohen 53 institucioneve arsimore që hapën dyert këtë vit, si dhe 450 shkollave dhe terreneve sportive që, sipas tij, janë rikonstruktuar gjatë dekadës së fundit.