Administrata e presidentit amerikan, Donald Trump, ka vendosur sanksione të reja ndaj Gjykatës Penale Ndërkombëtare (GJPN), duke synuar kufizimin e funksionimit të institucionit dhe duke shtuar presionin e Uashingtonit ndaj tij.
Vendimi u bë publik të premten dhe vjen pas përplasjeve të vazhdueshme mes administratës amerikane dhe gjykatës, për shkak të hetimeve dhe procedurave që përfshijnë zyrtarë amerikanë dhe izraelitë.
Sekretari amerikan i Shtetit, Marco Rubio, deklaroi se presidenti Trump nuk do të lejojë që GJPN-ja të ndjekë penalisht shtetasit amerikanë.
“Do t’i ndalojmë transaksionet me këtë gjykatë që vepron jashtë rregullave, do t’ia heqim burimet dhe do ta paralizojmë aftësinë e saj për të funksionuar”, u shpreh Rubio.
Sipas Reuters, sanksionet mund të prekin jo vetëm zyrtarët e gjykatës, por edhe kompanitë që i ofrojnë shërbime, përfshirë ato financiare, të sigurimeve dhe të teknologjisë.
Nga ana tjetër, zëvendësprokurorja e GJPN-së, Nazhat Shameem Khan, i dënoi masat amerikane, duke deklaruar se ato synojnë të minojnë sundimin e ligjit ndërkombëtar dhe pavarësinë e një institucioni gjyqësor.
Ajo theksoi se gjykata do të vijojë punën në të gjitha çështjet, hetimet dhe procedurat penale, pavarësisht presionit.
Përplasjet mes Uashingtonit dhe GJPN-së janë intensifikuar pas lëshimit të fletarrestimeve ndaj kryeministrit izraelit, Benjamin Netanyahu, dhe ish-ministrit të Mbrojtjes, Yoav Gallant, lidhur me dyshimet për krime lufte dhe krime kundër njerëzimit në Rripin e Gazës.
Shtetet e Bashkuara kanë kundërshtuar gjithashtu hetimet e mëparshme të gjykatës për veprimet e pjesëtarëve të ushtrisë amerikane në Afganistan.
E themeluar në vitin 2002, Gjykata Penale Ndërkombëtare ka mandat të ndjekë penalisht personat përgjegjës për gjenocid, krime lufte dhe krime kundër njerëzimit. SHBA-ja nuk është anëtare e këtij institucioni.
Ndërkohë, gjykata po shqyrton mënyra për të kufizuar ndikimin e sanksioneve, përfshirë ndryshimin e disa shërbimeve teknologjike dhe gjetjen e alternativave për shërbimet bankare.
Përshkallëzimi i kësaj përplasjeje ka ngritur shqetësime për ndikimin e presionit politik mbi drejtësinë ndërkombëtare dhe aftësinë e institucioneve gjyqësore për të vepruar në mënyrë të pavarur.