Vendimi i Shteteve të Bashkuara për të lejuar përkohësisht shitjen e naftës ruse nuk ndryshon qëndrimin e Gjermanisë ndaj Moskës. Zëdhënësi i qeverisë gjermane, Stefan Kornelius, deklaroi se Berlini po bashkëpunon me partnerët europianë për përgatitjen e masave të tjera ndëshkuese ndaj Rusisë.
Reagimi vjen pas një telefonate mes presidentit amerikan, Donald Trump, dhe homologut të tij rus, Vladimir Putin, në kuadër të përpjekjeve për të garantuar furnizimin e tregjeve me naftë.
Sipas njoftimeve, Uashingtoni ka autorizuar një përjashtim të përkohshëm nga sanksionet për naftën ruse. Masa parashikohet të zgjasë gjashtë muaj, deri më 7 prill 2027, me synimin për të lehtësuar mungesat globale të karburantit.
Megjithatë, lehtësimi i miratuar nga SHBA-ja nuk i heq kufizimet europiane. Sanksionet e Bashkimit Europian dhe të Britanisë së Madhe ndaj naftës dhe karburanteve ruse mbeten në fuqi.
Paralelisht, Gjermania është angazhuar të vërë në dispozicion deri në 15 milionë fuçi nga rezervat strategjike, përfshirë naftë bruto dhe produkte të tjera të karburantit, me qëllim mbështetjen e furnizimit të tregut.
Kjo masë është pjesë e përpjekjeve ndërkombëtare për të përballuar mungesat e mundshme të energjisë. Ndërkohë, Berlini konfirmon se lehtësimi i përkohshëm amerikan nuk e ndryshon politikën e tij për të mbajtur presionin ekonomik ndaj Rusisë