Serbia nuk do të përfshihet në grupin e vendeve për të cilat Komisioni Evropian do të publikojë udhërrëfyes të rinj orientues në procesin e anëtarësimit në Bashkimin Evropian. Në fund të tetorit, dokumentet pritet të publikohen për Malin e Zi, Shqipërinë, Ukrainën dhe Moldavinë, të cilat kanë shënuar përparimin më të madh në procesin e integrimit.
Ky vendim konfirmon se Serbia ka humbur pozicionin që dikur mbante mes vendeve kryesore në rrugën drejt anëtarësimit në BE.
“Serbia do të duhet të përmbushë më shumë kushte. Pas zgjedhjeve, do të shohim se sa serioze është Qeveria e saj, nëse vetëm do të flasë për dëshirën për t’u bërë anëtare e BE-së, apo edhe do të ndërmarrë hapa konkretë në këtë drejtim”, deklaroi komisionarja evropiane për Zgjerim, Marta Kos.
Për Strahinja Subotiçin, nga organizata joqeveritare Qendra për Politika Evropiane, me seli në Beograd, mospërfshirja e Serbisë në këtë proces përbën një paralajmërim serioz dhe dëshmi të ngecjes së saj në rrugën drejt integrimit evropian.
Në një prononcim për Radion Evropa e Lirë, ai theksoi se bllokimi nuk shfaqet vetëm te fakti që Serbia nuk ka hapur asnjë grupkapitull në negociatat e anëtarësimit prej vitesh, por edhe te pamundësia për të përfituar nga fondet në kuadër të Planit të Rritjes.
“Tani, në thelb, po na dërgohet mesazhi se mund të humbasim edhe përfitime të shumta që lidhen me anëtarësimin gradual në BE”, u shpreh Subotiçi.
Udhërrëfyesit do të jenë pjesë e paketës së zgjerimit, të cilën Komisioni Evropian planifikon ta miratojë më 28 tetor. Serbia nuk ka hapur asnjë grupkapitull në negociatat e anëtarësimit që nga dhjetori i vitit 2021.
Ndërkohë, situata në fushën e sundimit të ligjit është përkeqësuar, duke vështirësuar më tej përpjekjet e vendit për të dalë nga ngecja disavjeçare në procesin e integrimit.
Sipas ekspertëve, nëse kjo situatë vijon, Serbia rrezikon të mbetet në fund të radhës së vendeve që synojnë anëtarësimin në Bashkimin Evropian.