Reagimi i fundit i Erion Braçes ka ngritur shumë pikëpyetje për ato që ai ka parashtruar në rrjetet sociale. Deputeti socialist pretendon se ka dorëzuar dokumente pranë agjencive shtetërore për një person që e cilëson si “oligark” dhe që, sipas tij, është pjesë e politikës shqiptare, por ngre dyshime për arsyet pse institucionet nuk kanë vepruar.
Pa përmendur emra, Braçe e akuzon personin në fjalë se e ka ndërtuar pasurinë përmes shfrytëzimit të punonjësve, parave që ai i lidh me trafikun e drogës dhe transaksioneve që i cilëson fiktive. Ai pretendon gjithashtu se dokumentet për këtë çështje ua ka dorëzuar më herët institucioneve, por nuk kupton pse, sipas tij, personi është favorizuar.
Në reagimin e tij, deputeti socialist e përshkruan pasurinë e këtij personi si të krijuar në tri faza, duke përmendur shfrytëzimin e punonjësve në aktivitetet e biznesit, pretendime për para të lidhura me drogën dhe dyshime për shitblerje fiktive e fryrje të vlerave të pasurive.
Braçe nuk jep emrin e personit për të cilin flet dhe pretendimet e tij nuk janë konfirmuar në mënyrë të pavarur. Megjithatë, në fund të reagimit, ai ngre drejtpërdrejt pikëpyetjen për mënyrën se si janë trajtuar dokumentet që pretendon se ka dorëzuar.
“Ja kam dorëzuar herët unë letrat e tyre agjencive të kësaj qeverie; ja bëjnë muuu; nuk e kam kuptuar kurrë pse e kanë falur. Si thoni? Pse e kanë falur?”, shkruan Erion Braçe.
Sondazh
Lexo gjithashtu
