Presidenti amerikan, Donald Trump, ka ashpërsuar qëndrimin ndaj homologut ukrainas, Volodymyr Zelensky, duke deklaruar se Ukraina duhet të zgjedhë një udhëheqës të ri që mund të arrijë një marrëveshje për t’i dhënë fund luftës.
Gjatë një prononcimi për gazetarët jashtë Shtëpisë së Bardhë, Trump kritikoi sulmet e Ukrainës ndaj rafinerive ruse, duke pretenduar se ato po krijojnë probleme për tregun ndërkombëtar të energjisë.
“Bën mirë nëse i ndal”, u shpreh presidenti amerikan, duke iu referuar sulmeve ndaj infrastrukturës ruse të naftës. Ai shtoi se administrata e tij i ka kërkuar Kievit të mos ndërmarrë goditje të tilla, pasi ato mund të ndikojnë në tregun global të energjisë.
Trump pretendoi gjithashtu se Zelensky ka pasur mundësi të arrijë një marrëveshje, por sipas tij, nuk ka përfituar nga këto mundësi. Për këtë arsye, ai sugjeroi se Ukraina duhet të ketë një drejtues të ri, i cili do të ishte i gatshëm të negocionte.
Reagimi i Trumpit vjen pas kritikave të Zelenskyt ndaj marrëveshjes së re mes SHBA-së dhe Rusisë për eksportet e naftës ruse. Presidenti ukrainas ka kundërshtuar lehtësimin e eksporteve, duke argumentuar se të ardhurat nga shitja e naftës mund të ndihmojnë Moskën të financojë luftën kundër Ukrainës.
Sondazh
Lexo gjithashtu
