Përfaqësuesja e Lartë e Bashkimit Evropian për Politikë të Jashtme dhe Siguri, Kaja Kallas, ka kundërshtuar lehtësimin e sanksioneve ndaj naftës dizel ruse, duke paralajmëruar se një vendim i tillë do t’i siguronte Moskës të ardhura shtesë për të financuar luftën në Ukrainë.
Ajo theksoi se ky nuk është momenti që Bashkimi Evropian të zbusë presionin ndaj Rusisë, ndërsa paralajmëroi masa të reja kundër individëve dhe subjekteve që mbështesin përpjekjet ushtarake të Moskës.
“Pezullimi i sanksioneve ndaj naftës dizel ruse i siguron Moskës më shumë të ardhura për të zhvilluar luftën. Ky nuk është momenti për të lehtësuar presionin ndaj Rusisë dhe Evropa nuk do ta bëjë këtë”, deklaroi Kallas.
Ajo bëri të ditur se ministrat e Jashtëm të vendeve anëtare të BE-së synojnë të miratojnë të hënën një paketë të re sanksionesh, të cilën e cilësoi si më të madhën e këtij lloji që nga fillimi i luftës.
Masat e reja pritet të përfshijnë individë dhe subjekte që, sipas Bashkimit Evropian, kontribuojnë në funksionimin e makinerisë ruse të luftës.
Deklaratat e Kallas vijnë në një kohë kur vendet evropiane po diskutojnë mënyra të reja për të kufizuar të ardhurat e Rusisë dhe për të shtuar presionin ekonomik ndaj Moskës, në përgjigje të luftës në Ukrainë.