Një 29-vjeçar është arrestuar në Kamëz, pasi dyshohet se transportonte me automjet një pistoletë me qëllim trafikimin e saj. Gjatë kontrollit të banesës, policia i gjeti edhe një armë gjahu pa leje dhe 50 fishekë. Për të ka nisur gjithashtu një hetim pasuror.
I arrestuari është Ervis Cara, banues në Krujë, i dënuar më parë për veprën penale “Trafikimi i mjeteve motorike”.
Sipas policisë, gjatë kontrollit të automjetit që drejtonte 29-vjeçari, u gjet një pistoletë brenda një çante, së bashku me një bllok shënimesh. Më pas, gjatë kontrollit të banesës së tij, shërbimet gjetën dhe sekuestruan një armë gjahu pa leje dhe 50 fishekë.
Në kuadër të operacionit policor të koduar “Last Drive II”, u sekuestruan pistoleta, arma e gjahut me municionet, automjeti, celulari dhe blloku i shënimeve. Sipas policisë, në këtë të fundit dyshohet se mbaheshin të dhëna për shuma të ndryshme parash.
Për Carën ka nisur hetimi pasuror, ndërsa materialet procedurale i janë referuar Prokurorisë së Tiranës për veprat penale “Trafikimi i armëve dhe municionit” dhe “Fshehja e të ardhurave”.