Kryeministri Edi Rama ka dënuar sulmet e rebelëve Huthi ndaj Arabisë Saudite, përfshirë sulmin vdekjeprurës ndaj Aeroportit Ndërkombëtar “Mbreti Khalid” në Riad. Në një reagim në platformën X, Rama shprehu mbështetjen e Shqipërisë për Arabinë Saudite dhe popullin e saj, ndërsa u përcolli ngushëllime familjeve të viktimave dhe u uroi shërim të shpejtë të plagosurve.
“Nuk mund të ketë asnjë justifikim për sulmet ndaj civilëve dhe infrastrukturës civile. Këto akte kërcënojnë paqen rajonale dhe sigurinë e rrugëve jetike të transportit ndërkombëtar”, shkroi kryeministri.
Rama deklaroi gjithashtu se Huthët dhe sponsorët e tyre në Teheran duhet të mbajnë përgjegjësi, duke iu referuar mbështetjes që, sipas tij, Irani u jep rebelëve.
Ai i bëri thirrje bashkësisë ndërkombëtare të reagojë me një zë të përbashkët dhe të kërkojë ndalimin e menjëhershëm të sulmeve.
“Shqipëria dënon me forcën më të madhe sulmet e Huthëve kundër Arabisë Saudite, përfshirë sulmin vdekjeprurës ndaj Aeroportit Ndërkombëtar Mbreti Khalid në Riad. Qëndrojmë vendosmërisht në krah të Mbretërisë së Arabisë Saudite dhe popullit të saj”, thuhet në deklaratën e Ramës.
Në reagimin e tij, kryeministri theksoi se sulmet ndaj civilëve dhe infrastrukturës civile nuk mund të justifikohen dhe përbëjnë kërcënim për paqen në rajon.