Sheqeri i kallamit dhe shurupi i misrit me përmbajtje të lartë fruktoze kanë efekte të ngjashme në organizëm. Ekspertët theksojnë se, për shëndetin, më e rëndësishme është sasia e sheqerit të konsumuar sesa burimi nga i cili ai vjen. Sheqeri i kallamit dhe shurupi i misrit përdoren gjerësisht në ushqime dhe pije, por shpesh lind pyetja se cili prej tyre është më i mirë për kontrollin e sheqerit në gjak. Sipas një artikulli të publikuar organizmi i përpunon këta dy ëmbëltues në mënyrë të ngjashme. Për këtë arsye, zëvendësimi i njërit me tjetrin nuk pritet të sjellë ndryshime të rëndësishme në shëndet, nëse sasia e konsumuar mbetet e njëjtë.
Cili është ndryshimi mes tyre?
Sheqeri i kallamit, i njohur si saharozë, përftohet nga kallami i sheqerit ose panxhari i sheqerit. Ai përbëhet nga dy sheqerna të thjeshta: glukoza dhe fruktoza, në përmasa afërsisht të barabarta. Shurupi i misrit prodhohet nga niseshteja e misrit dhe përmban kryesisht glukozë. Ndërsa shurupi i misrit me përmbajtje të lartë fruktoze përpunohet në mënyrë që një pjesë e glukozës të shndërrohet në fruktozë. Lloji që përdoret shpesh në pijet e gazuara përmban rreth 55% fruktozë dhe 45% glukozë, ndërsa sheqeri i zakonshëm ka afërsisht 50% të secilit. Pavarësisht ndryshimeve në përbërje dhe mënyrën e prodhimit, të dy ëmbëltuesit ofrojnë rreth katër kalori për gram dhe nuk përmbajnë fibra apo sasi të konsiderueshme vitaminash dhe mineralesh.
Si ndikojnë në shëndet?
Sipas kërkimeve të përmendura në artikull, kur konsumohen në sasi të krahasueshme, sheqeri i kallamit dhe shurupi i misrit me fruktozë të lartë nuk tregojnë dallime të rëndësishme në efektet e tyre shëndetësore.
Konsumimi i tepërt i sheqernave të shtuara mund të rrisë rrezikun për:
- Shtim në peshë dhe obezitet.
- Rritje të sheqerit në gjak dhe rezistencë ndaj insulinës.
- Grumbullim të yndyrës në mëlçi.
- Rritje të kolesterolit dhe triglicerideve.
- Sëmundje të zemrës.
Edhe sheqernat që konsiderohen më natyrale, si mjalti dhe shurupi i agaves, mund të kontribuojnë në këto rreziqe nëse konsumohen në sasi të tepërta.
Sa sheqer rekomandohet të konsumojmë?
Sipas artikullit, rekomandohet që sheqernat e shtuara të përbëjnë më pak se 6% të kalorive ditore. Kjo do të thotë se, për një person që konsumon 2.000 kalori në ditë, sasia do të ishte më pak se 30 gramë sheqer të shtuar. Për të kufizuar konsumin, këshillohet të reduktohen pijet me sheqer, ëmbëlsirat, drithërat e mëngjesit të ëmbëlsuara dhe ushqimet e përpunuara që përmbajnë sheqerna të shtuara.
