Një sondazh i BMW Group North America ka nxjerrë në pah se shumica e amerikanëve gjatë ditës përdorin shumë më pak autonomi sesa kërkojnë nga një veturë elektrike përpara se ta blejnë. Në studim morën pjesë 1,005 të rritur nga SHBA-ja.
Të lidhura
None found
Rreth 73 për qind e pjesëmarrësve thanë se për nevojat e një dite të zakonshme do t’u mjaftonte një autonomi prej 75 miljesh ose më pak, që korrespondon me rreth 121 kilometra. Por kur u pyetën për nivelin e autonomisë që do të dëshironin te një veturë elektrike, pritshmëritë e tyre rezultuan dukshëm më të larta, transmeton Telegrafi.
Sondazhi u zhvillua nga 11 deri më 13 shtator. Sipas rezultateve, 42 për qind e të anketuarve do të kërkonin të paktën 300 milje autonomi, apo afërsisht 483 kilometra. Për 18 për qind të tyre, një veturë elektrike nuk do të merrej fare në konsideratë nëse nuk do të ofronte minimumi 400 milje, përkatësisht rreth 644 kilometra, me një karikim.
Këto shifra evidentojnë diferencën mes përdorimit të përditshëm dhe pritjeve të blerësve. Udhëtimet e zakonshme në SHBA, përfshirë shkuarjen në punë, dërgimin e fëmijëve në shkollë dhe blerjen e ushqimeve, zakonisht përshkojnë distanca të shkurtra dhe nuk kërkojnë autonomi të lartë.
Pavarësisht kësaj, 72 për qind e të anketuarve e cilësuan autonominë minimale si një element vendimtar në përzgjedhjen e një veture elektrike. Pengesa kryesore mbetet çmimi, pasi 51 për qind e pjesëmarrësve thanë se kostoja e blerjes është arsyeja më e madhe që i frenon të kalojnë te automjetet elektrike.
Alexander Schleicher, përgjegjës për elektromobilitetin në BMW Group North America, e interpretoi këtë prirje si dëshmi të një tregu më të pjekur.
“Ndërsa autonomia dhe kapacitetet e karikimit vazhdojnë të përmirësohen, po shohim se konsumatorët po i vlerësojnë veturat elektrike njësoj si çdo automjet tjetër: sipas performancës, veçorive dhe vlerës që ofrojnë, e jo mbi bazën e perceptimeve të vjetruara për autonominë”, deklaroi ai.
Aspekti financiar ndikon si në arsyet për blerje, ashtu edhe në pengesat ndaj tyre. Vetëm 27 për qind e të anketuarve përmendën kostot më të ulëta të përdorimit dhe mirëmbajtjes si motiv për të zgjedhur një veturë elektrike. Në të njëjtën kohë, 55 për qind thanë se do të shqyrtonin blerjen e një veture elektrike të përdorur ose të certifikuar si të përdorur, nëse kursimi do të ishte mjaftueshëm i madh.
Një rol të rëndësishëm duket se luan edhe koha e karikimit. Pjesëmarrësit u pyetën nëse do të ndiheshin më të prirë të blinin një veturë elektrike që mund të fitonte rreth 150 milje autonomi, ose 241 kilometra, për vetëm 10 minuta. Për 53 për qind të tyre, një mundësi e tillë do ta bënte një automjet elektrik më tërheqës për blerje.
Megjithatë, përgjigjet ndryshuan sipas grupmoshave. Karikimi i shpejtë do të ndikonte në vendimin e rreth 70 për qind të pjesëtarëve të gjeneratës Z dhe 65 për qind të mijëvjeçarëve. Në mesin e pjesëtarëve të gjeneratës së “baby boomers”, këtë ndikim e pranuan vetëm 30 për qind.
Rezultatet tregojnë gjithashtu se konsumatorët po bëhen më tolerantë ndaj kohës së nevojshme për karikim. Këtë vit, 55 për qind e të anketuarve thanë se do ta konsideronin të pranueshme një ndalesë deri në 30 minuta për karikim të shpejtë. Një vit më parë, në sondazhin e Mini USA të vitit 2024, këtë qëndrim e kishin 48 për qind e pjesëmarrësve.
Edhe në rastin e karikimit të shpejtë, koha mbetet dukshëm më e shkurtër se ajo që nevojitet për karikimin përmes një prize të zakonshme shtëpiake të nivelit të parë. Sipas udhëzimeve federale amerikane, ky proces zakonisht zgjat nga tetë deri në 16 orë, në varësi të veturës dhe kapacitetit të baterisë.
Ndryshim është vërejtur edhe në mënyrën se si perceptohen pronarët e veturave elektrike. Vetëm 56 për qind e të anketuarve i konsideruan ende ata përdorues të hershëm të teknologjisë, krahasuar me 62 për qind në sondazhin e BMW-së të vitit 2025.
Në total, 68 për qind e pjesëmarrësve deklaruan se do ta merrnin në konsideratë blerjen e një veture elektrike. Kjo tregon se interesi për këto automjete po zgjerohet, ndonëse çmimi, autonomia dhe shpejtësia e karikimit vazhdojnë të jenë faktorë përcaktues për konsumatorët. /Telegrafi/
