245 aplikantë për Rrjetin MIA/ Rama: 200 intervista dhe ide të reja për komunikimin publik

Kryeministri Edi Rama ka njoftuar përfundimin e fazës së intervistave për Rrjetin MIA.

Sipas Ramës, në këtë proces kanë aplikuar 245 persona, ndërsa janë zhvilluar 200 intervista.

Kryeministri nënvizon se propozimet e paraqitura përfshijnë ide të ndryshme, nga përdorimi i inteligjencës artificiale dhe verifikimi i informacionit, deri te përmirësimi i komunikimit me qytetarët dhe përfshirja e tyre në gjetjen e zgjidhjeve.

Rama bëri me dije se, tashmë procesi hyn në fazën e përzgjedhjes, ku synohet që idetë e paraqitura të zhvillohen më tej dhe të shndërrohen në rezultate konkrete për komunikimin publik.

“245 aplikantë, 200 intervista dhe plot ide të reja për komunikimin publik.

Kur prezantuam Rrjetin MIA, ideja ishte të hapnim dyert për njerëz me ide, energji dhe aftësi për të sjellë diçka ndryshe në mënyrën si institucionet komunikojnë me qytetarët.

Tashmë ka përfunduar faza e intervistave dhe ajo që më duket më interesante është larmia e propozimeve. Nga përdorimi i inteligjencës artificiale dhe verifikimi i informacionit, te mënyrat se si mund t'i dëgjojmë më mirë qytetarët dhe t'i përfshijmë në gjetjen e zgjidhjeve.

Tani vijon përzgjedhja, me synimin që idetë më të mira të zhvillohen më tej dhe të sjellin rezultate konkrete”, shkruan Rama./ CNA