Makina hyn në tavernën plot me klientë në Selanik, tre të plagosur

Një aksident i rëndë është regjistruar në orët e para të së dielës në Evosmos të Selanikut, ku një automjet ka hyrë në një tavernë të mbushur me klientë, duke plagosur tre persona. Momenti i frikshëm është kapur nga kamerat e sigurisë.

Sipas mediave greke, ngjarja ndodhi rreth orës 01:00, në rrugën Agamemnonos, kur një 45-vjeçar i huaj, që drejtonte automjetin, humbi kontrollin dhe u fut në zonën ku klientët po darkonin në tavolinat e jashtme të tavernës.

Makina përplasi tavolinat dhe goditi disa prej personave që ndodheshin aty. Përplasja u ndal nga vazot e mëdha me lule të vendosura rreth ambientit të jashtëm, të cilat penguan automjetin të depërtonte më tej mes klientëve.

Tre persona mbetën të plagosur dhe morën ndihmë mjekësore. Sipas dëshmive, mes të lënduarve ishte edhe bashkëshorti i një klienteje, i cili u shtrua në spital./ CNA