Historiani dhe studiuesi Auron Tare ka ngritur shqetësimin për gjendjen e shtëpisë së shkrimtarit të njohur Mitrush Kuteli, duke denoncuar braktisjen dhe kthimin e saj në vendgrumbullim mbeturinash.
Përmes një reagimi në rrjete sociale, Tare ka publikuar pamjet nga shtëpia të mbushura me mbeturina teksa sjell në vëmendje edhe një fragment nga letra e lamtumirës së Kutelit për bashkëshorten, me një mesazh të fortë për dashurinë ndaj atdheut dhe gjuhës shqipe.
”Prozator, poet e folklorist, publicist, përralltar e kritik letrar, Kuteli i la që në të gjallë kulturës dhe mendimit shqiptar mbi 10 botime letrare. Shqiptarët i hedhin plehra themeleve të shtëpisë së tij. Vetëm 20 metra nga kopështi i Lasgushit shtëpia është rrënuar dhe ka mbetur vend hedhurinash. Rrugica e ngushtë që dikur lidhte shtëpitë e dy njerzve të letrave është mbyllur me mure dhe gurë si për ti ndarë ata poetë edhe pas vdekjes”,- shkruan Tare ndër të tjera.
