Ministria e Arsimit miraton Kod Etike/ Ndalohen veshjet sportive dhe makeup-i i tepërt

Ministria e Arsimit ka miratuar një Kod të ri Etike, mbi standardet e sjelljes që duhet të respektojnë punonjësit brenda dhe jashtë institucionit.

Dokumenti, i miratuar nga ministrja Mirela Kumbaro synon të garantojë integritetin e administratës publike dhe të shmangë veprimet që mund të dëmtojnë imazhin e institucionit.

Kodi i ri i Etikës përcakton se burimet e institucionit, përfshirë pajisjet, mjetet e punës, infrastrukturën teknologjike dhe bazat e të dhënave, duhet të përdoren vetëm për qëllime zyrtare dhe në shërbim të interesit publik.

Rregulla të veçanta parashikohen edhe për paraqitjen e punonjësve në ambientet e punës. Veshjet ekstravagante ose sportive, si dhe makiazhi i tepruar, nuk do të pranohen.

Gjithashtu, nëpunësit nuk duhet të mbajnë veshje, simbole apo elemente të tjera që shprehin bindje politike.