TIRANË- Klevis Balliu e transmetoi live në rrjetin social Facebook mbledhjen me dyer të mbyllura të Sekretariatit të Etikës, ku diskutohej kërkesa e 10 deputetëve të Partisë Socialiste për përjashtimin e tij dhe të kreut të grupit parlamentar demokrat, Gazment Bardhi, me 60 ditë nga punimet e Kuvendit.
Socialistët thonë se në seancën e 8 tetorit, kur po votohej Reforma Territoriale, dy deputetët e opozitës përdorën sende të forta, duke penguar zhvillimin normal të seancës, si dhe fyen kryeministrin Edi Rama, kryetarin e Kuvendit Niko Peleshi, ministrat dhe deputetët socialistë.
“Ka një vendim gjykate që goditja me vezë nuk quhet akt dhune. Një protestues i arrestuar nga policia se goditi me vezë makinën e kryeministrit, arrestimi i tij është shpallur i paligjshëm. S'mund ta quash akt dhune goditjen me vezë, se është qesharake. Nuk di të kem ofenduar kryetarin e Kuvendit, deputetë, ministra, por i kam thënë ‘sugar daddy’ i Agasit, Ramës, dhe ‘Lubi Ballukut’. Të kërkosh përjashtimin me dy muaj se është goditur me dy vezë ‘sugar daddy’ i Agasit është qesharake, dhe ta quash dhunë është qesharake. Veza është kudo në botë, përjashtimi me dy muaj nuk ndodh”, tha Klevis Balliu.
Në mbrojtjen e tij, Klevis Balliu pretendoi se reagimi i tyre ishte kundërpërgjigje ndaj një sulmi nga një deputet i PS-së.
“Keni një video që shishja e parë e ujit vjen nga ana e PS-së, drejt kreut të grupit të PD-së, Gazment Bardhi. Kush është ai person? Pse nuk e keni thirrur? Pse nuk kërkoni përjashtimin e tyre? Si të mos reagojmë ne kur na godisni? Ne u përjashtokemi dhe ju u dekorokeni? Nuk jeni me brirë ju. Pse për ju nuk funksionoka kjo rregullore? Nëse përjashtoni me dy muaj deputetin socialist, na përjashtoni edhe ne, dakord. A thua se i gjuajtëm me plumba atij, për dy kokrra vezë”, vijoi Balliu.
Akuzat se pati dhunë nga ana e tyre ndaj përfaqësuesve të mazhorancës në Kuvend, Balliu i quajti të pavërteta.
“Është mashtrim të pretendosh se kemi dhunuar njeri, se kur dhunohet ka edhe shenja. Duan të na përjashtojnë nga Kuvendi. Në çdo vend të botës goditen politikanë me vezë, por vetëm te ne përjashtohen me dy muaj”, theksoi ai.
Balliu mbrojti edhe veprimet e Gazment Bardhit, i cili gjatë seancës hodhi shishe uji në drejtim të përfaqësuesve të mazhorancës.
“Ujë hodhi, nuk hodhi shishe benzine. Na lejoni të bëjmë punën. Janë diskutime të rëndësishme për çështjen e sigurisë që priten. Më referoni pak ku është që duhet dy muaj për dy vezë. Çfarë është kjo, një muaj për një vezë?”, theksoi Balliu.
Pas diskutimeve, Ulsi Manja, i cili drejtonte mbledhjen, artikuloi vendimmarrjen e Sekretariatit të Etikës për përjashtimin me nga 60 ditë nga punimet e Kuvendit të dy deputetëve demokratë, Gazment Bardhi dhe Klevis Balliu.
“U përdorën vezë, shishet e ujit, me ujë, pa ujë, u përdorën. U përdor një bori. U godit një gardist. Një shishe ka goditur në kokë një ministre. Flet për një vendim gjykate, por ai është për protestues. Ti je deputet, ke Kod Etike”, tha Manja.
“Nuk ka asnjë rregullore që përjashton deputetët për dy muaj. Hera e parë në historinë e botës që veza qenka lëndë piroteknike. Unë e dija që vezën e bën pula. Apo veza pulën? Sipas rregullores përjashtohesh nëse përdor lëndë piroteknike. Sipas Manjës dhe të tjerëve, veza qenka lëndë piroteknike. Kjo ka vetëm një qëllim, të godasë grupin e PD-së, reagimin e drejtë që kemi në Kuvend. Çfarë thotë Edi Rama, do të bëjnë. Do ta ankimojmë. Kemi pasur disa procese gjyqësore për këtë çështje dhe janë fituar të gjitha”, tha Klevis Balliu.
Demokratët e kundërshtuan masën disiplinore duke argumentuar se Rregullorja e Kuvendit parashikon përjashtim deri në 10 ditë për pengimin e seancës, shkaktimin e kaosit, fyerjet apo goditjet ndaj deputetëve. Sipas tyre përjashtimi deri në 60 ditë zbatohet vetëm në rastet e përdorimit të lëndëve piroteknike apo tymuese.
Ata akuzuan se vendimi u mor me urdhër të kryeministrit Edi Rama, ndërsa paralajmëruan se vendimin do ta ankimojnë në Byronë e Kuvendit. Nëse ai hyn në fuqi, dy deputetët demokratë i përjashton edhe nga marrja e pagës për dy muaj.
“Sa i përket anës ligjore, çdo veprim që mund të pretendohet nga ana e kolegëve që kanë bërë kërkesën, që nga formulimi i saj është i gabuar, sepse Rregullorja e Parlamentit përshkruan kur ka dhunë ndaj një kolegu, që mund ta quash goditje me shishe, kur bllokohet foltorja, bëhet zhurmë ose ka fyerje. Të gjitha këto që janë të shkruara nga kërkuesit janë të referuara te neni 65/1, pika e parë. Të dy kolegët nuk janë dënuar në këtë sesion parlamentar, kështu që nuk mund të shkohej te 60-ditëshi, por këtu është bërë normë të shkelet Rregullorja. I ka të gjitha elementet për të cilat janë akuzuar kolegët dhe ka përcaktuar që është 10 ditë e jo më tepër. Nuk ka lëndë piroteknike të futura. Kolegët e tyre nuk i shikojnë, nuk shikojnë nga syri i majtë dhe as dëgjojnë nga veshi i majtë kur ata hedhin bidonë. Çfarë thotë Edi Rama, do të bëjnë”, tha Saimir Korreshi.
Duke dënuar vendimin për përjashtimin e dy deputetëve të tij, kreu i Partisë Demokratike, Sali Berisha, paralajmëroi se grupi parlamentar do të mblidhet për të marrë një qëndrim.
Kreu i Grupit Parlamentar të Partisë Demokratike, Gazment Bardhi, ka reaguar pasi Komisioni i Etikës në Kuvend vendosi përjashtimin e tij dhe të deputetit Klevis Balliu me 60 ditë nga punimet e Kuvendit.
Përmes një postimi në rrjetet sociale, Bardhi ka shkruar se përjashtimi i tij është bërë me urdhër të kryeministrit Edi Rama, me qëllim që t’i mbyllin gojën për të mos denoncuar më skandalet dhe korrupsionin e Qeverisë.
Bardhi shkruan se sot Rama ka çuar më tej ‘aferën korruptive të nisur me kontratën e firmosur nga Belinda Balluku për dy termocentralet lundruese të Vlorës.’
Kjo pasi sipas Bardhit, KESH ka shpallur fituesin e një tenderi të ri prej 18.6 milionë eurosh, pa TVSH, për operimin dhe mirëmbajtjen e dy Tigrave, gjatë dy viteve të ardhshme.
Me kontratën e re, sipas Bardhit fatura e “Tigrave të KORRUPSIONIT” po shkon drejt 100 milionë eurove për diçka që ai thotë se vendit nuk i duhet dhe që nuk na sjell asnjë përfitim publik. Ai thotë gjithashtu se SPAK ka 2 vjet që qëndron në heshtje për aferën korruptive të Belinda Ballukut.
Reagimi i Bardhit:
Tigrat 1 dhe 2, një kontratë e re për një aferë të vjetër korruptive!
Duke më përjashtuar për 60 ditë nga Parlamenti, në kundërshtim me Rregulloren, Edi Rama mendon se do të më mbyllë gojën për korrupsionin e qeverisjes së tij, që po shkatërron jetën e shqiptarëve.
Rasti i “Tigrave të Vlorës”, dy karakatina lundruese që po u kushtojnë shqiptarëve mbi 100 milionë euro, është një tjetër arsye pse nuk do të hesht.
Sot, Edi Rama ka çuar më tej aferën korruptive të nisur me kontratën e firmosur nga Belinda Balluku për dy termocentralet lundruese të Vlorës.
KESH ka shpallur fituesin e një tenderi të ri prej 18.6 milionë eurosh, pa TVSH, për operimin dhe mirëmbajtjen e dy Tigrave, gjatë dy viteve të ardhshme. Pra, një kontratë e re milionëshe për të mbajtur në funksion dy termocentrale që Shqipërisë nuk i duhen. Dhe kjo nuk është fatura përfundimtare: karburanti dhe shpenzimet e tjera që mbulohen veçmas nga KESH do t’u shtohen parave që shqiptarët duhet të paguajnë për favoret dhe përfitimet personale të Edi Ramës në funksion të pushtetit të tij.
Ky është akti i dytë i së njëjtës aferë korruptive.
Akti i parë nisi me kontraktimin e dy termocentraleve lundruesebnga Belinda Balluku, nën pretekstin e një krize energjetike që nuk erdhi kurrë. Për këtë aferë, kam dorëzuar në SPAK një kallëzim penal, të shoqëruar me dokumentacion zyrtar që provon paracaktimin e fituesit, garën fiktive, favorizimin e kompanisë dhe kostot e pajustifikuara.
Rreth 70 milionë euro janë paguar tashmë për këtë projekt, ndërkohë që ajo pak energji e prodhuar nga këto termocentrale ka kushtuar rreth 675 euro për MËh, kundrejt 111 eurove në pikun e çmimeve të bursës. Gjashtë herë më shtrenjtë na ka kushtuar energjia e Tigrave të Korrupsionit të Ramës dhe Balkukut.
Me kontratën e re, fatura e “Tigrave të KORRUPSIONIT” po shkon drejt 100 milionë eurove për diçka që vendit nuk i duhet dhe që nuk na sjell asnjë përfitim publik.
Sa miliona të tjera duhet të paguajnë shqiptarët që SPAK-u të veprojë?
Pse SPAK-u ngec sa herë që gjurmët e korrupsionit të denoncuar çojnë te Belinda Balluku dhe Edi Rama? Pse nuk ndjek rrugën e parave për të zbuluar kush përfiton nga këto kontrata?
Mjafton të ndiqen paratë. Aty janë edhe përgjigjet që i mungojnë SPAK-ut.
Deputetja e Partisë Demokratike, Jorida Tabaku, ka reaguar pas përjashtimit me 60 ditë të Gazment Bardhit dhe Klevis Balliut nga punimet e Kuvendit, pas përplasjeve gjatë seancës ku u votua Reforma Territoriale.
Përmes një postimi në rrjetet sociale, Tabaku shkruan se mazhoranca i përdor rregullat si mburojë për veten dhe si kamxhik për opozitën. Pra sipas deputetes demokrate rregullat nuk vlejnë njësoj për të gjithë.
Tabaku sjell në vëmendje rastin e ish-zv.kryeministres Belinda Balluku, mandati i së cilës sipas saj u mbrojt nga mazhoranca, me qëllim që ajo t'i shpëtonte arrestimit.
Ajo thekson gjithashtu se Parlamenti është kthyer në një hapësirë ku 'debati pengohet, qytetarët shpërfillen dhe kërkesës për llogaridhënie i përgjigjen me kërcënime e përjashtime.'
Reagimi i Tabakut:
Shqipëria ka nevojë për një Parlament ku rregullat vlejnë njësoj për të gjithë. Sot, fatkeqësisht, ka një shumicë që i përdor ato sipas interesit: si mburojë për veten dhe si kamzhik ndaj opozitës.
Gazment Bardhi dhe Klevis Balliu janë ndëshkuar me nga 60 ditë përjashtim. Ndërkohë, shkeljet e deputetëve të mazhorancës janë toleruar. Ky standard i dyfishtë e ka kthyer etikën parlamentare në instrument ndëshkimi politik.
Është i njëjti Parlament që sajoi procedura për të mbrojtur mandatin e ish-zëvendëskryeministres dhe që sot përdor çdo mjet për të goditur opozitën. Kur pushteti kërkon mbrojtje, rregullat përkulen. Kur opozita kërkon llogari, ndëshkimet rëndohen.
Arroganca e një qeverie të korruptuar, të kapur me duart në xhepat e shqiptarëve, ka gjetur strehë edhe në shtëpinë ku duhet të dëgjohet zëri i tyre. Parlamenti është kthyer në një hapësirë ku debati pengohet, qytetarët shpërfillen dhe kërkesës për llogaridhënie i përgjigjen me kërcënime e përjashtime.
Ndëshkimi i kolegëve është një tjetër shembull i turpshëm i këtij degradimi. Përjashtimi i deputetëve pengon përfaqësimin e qytetarëve që i kanë zgjedhur dhe dobëson kontrollin parlamentar mbi qeverinë.
Kjo arrogancë duhet ndëshkuar me votë. Largimi i kësaj shumice socialiste është rruga për t’i kthyer Parlamentit dinjitetin, debatit lirinë dhe qytetarëve një institucion që u shërben atyre, jo pushtetit dhe ligjeve me porosi.
Sali Berisha thotë se dy deputetët demokratë, Gazment Bardhi dhe Klevis Balliu u përjahstuan me nga 60 ditë nga punimet e Kuvendit me urdhër të kryeministrit Edi Rama. Gjatë konferencës në selinë blu, ai tha se Bardhi e Balliu u përjashtuan pa asnjë bazë ligjore, ndërsa kryeministrin Edi Rama e quajti armik të egër të parlamentarizmit.
“Sot Edi Rama urdhëroi, pa asnjë bazë ligjore, të përjashtojë kryetarin e grupit të Partisë Demokratike dhe nënkryetarin e komisionit të sigurisë, zotërinjtë Gazment Bardhi dhe Klevis Balliu, dy muaj nga parlamenti. Armik i egër i parlamentarizmit, i protestës dhe fjalës së lirë, Edi Rama me akte të tilla dëshmon se është një narko-diktator i urryer për shqiptarët. Dënojmë me forcën më të madhe këtë vendim antiligjor, antikushtetues, kryekëput të pabazë. Natyrisht, grupi parlamentar do mblidhet të shqyrtojë qëndrimet përkatëse ndaj këtij vendimit”, tha Berisha.
Lajme të tjera
-
Kongresi i Autoriteteve Lokale kritikon ‘Territorialen’: Qytetarët e prekur s’u konsultuan në kohë për Reformën
12 Tetor, 18:16 -
Faza e dytë e Reformës Territoriale, PS kërkon ngritjen e një Komisioni të Posaçëm Parlamentar! Parashikohet rishikimi i kompetencave të bashkive dhe kuadrit ligjor
12 Tetor, 17:36 -
Ylli Pata: Karma e zgjerimit të skandalit LaCivita në median amerikane
12 Tetor, 17:15
-
Përjashtimi me 60 ditë nga Kuvendi i Bardhit e Balliut, reagon Tabaku: Standard i dyfishtë, është i njëjti Parlament që sajoi procedura për të mbrojtur mandatin e Ballukut
12 Tetor, 15:33 -
'Debati me Braçen nuk e dëmtoi PS', analiza e Spahiut në Report TV: Rama doli më i fortë politikisht, Territorialja i jep avantazh në zgjedhjet vendore
12 Tetor, 14:48 -
Vendoret 2027/ PD kundër votimit elektronik, Berisha: Teknologjia manipulohet! PS: Të zgjerohet (VIDEO)
12 Tetor, 12:35
-
Përplasjet për ‘Territorialen’/ Të mërkurën zhvillohet mbledhja e zgjeruar e Grupit Parlamentar të PS, të pranishëm Rama, ministrat dhe deputetët
11 Tetor, 18:05 -
Eduart Zaloshnja: Kosto elektorale për PS-në nga ndarja e re territoriale?
11 Tetor, 18:02
-
Godina e re te ‘Parku Rinia’, Tabaku: Trojet publike po jepen për ndërtim, do të heqë mushkërinë e fundit të Tiranës (VIDEO)
11 Tetor, 14:33 -
Golemi merr statusin e qytetit, Balla: Kryetari i Kavajës doli kundër! Bashkia ka dyfish të ardhura se Lushnja, por shtron dhjetë herë më pak rrugë (VIDEO)
11 Tetor, 14:25 -
Goditën Ramën me ujë e vezë, ‘Etika’ vendos nesër për Bardhin e Balliun! PS kërkon 60 ditë përjashtim
11 Tetor, 14:21 -
‘Territorialja’ riktheu Ballukun në Kuvend, Bardhi: E papranueshme që një e akuzuar për 14 vepra penale merr vendime për qytetarët! SPAK të veprojë sipas ligjit
11 Tetor, 14:17
Komente
Komento