Kryeministri britanik: Rusia ndërhyri në referendumin e Brexit! Paralajmërimi për Francën dhe Gjermaninë

Kryeministri britanik Andy Burnham ka deklaruar se Rusia ka ndërhyrë në referendumin e vitit 2016 për daljen e Britanisë së Madhe nga Bashkimi Evropian, ndërsa ka paralajmëruar se aktivitete të ngjashme po zhvillohen edhe në Francë dhe Gjermani, raporton BBC.

Në një intervistë për podcastin “The Rest Is Politics”, Burnham pasi mbërriti në rezidencën qeveritare në Downing Street, kërkoi informacion mbi ndërhyrjet e mundshme ruse në votimin e vitit 2016.

“Kam marrë përgjigjen e qartë se, po, ka pasur ndërhyrje”, deklaroi Burnham.

Ai shtoi se Britania e Madhe nuk ka qenë mjaftueshëm aktive në informimin e publikut për përmasat e përpjekjeve të aktorëve të huaj për të ndikuar dhe për të penguar proceset politike.

“Ne nuk i kemi informuar njerëzit mjaftueshëm për shkallën në të cilën aktorë nga jashtë përpiqen të cenojnë procesin politik”, u shpreh ai.

Megjithatë, Burnham nuk dha detaje të mëtejshme mbi natyrën apo përmasat e veprimtarisë së Moskës gjatë referendumit për Brexit.

Deklaratat e tij janë kundërshtuar nga grupi i fushatës pro-Brexit, Britain Unbound, i cili i cilësoi ato si “një tjetër përpjekje të vrazhdë për të minuar legjitimitetin e vendimit që populli britanik mori në vitin 2016”.

Grupi theksoi se ndërhyrja e huaj në zgjedhjet britanike është e papranueshme, por kundërshtoi pretendimin se ndërhyrja ruse kishte ndikuar në rezultatin e referendumit.

“Nuk ka arsye të forta për të besuar se ndërhyrja ruse ndikoi në rezultatin e referendumit të vitit 2016”, thuhet në reagimin e grupit.

Burnham bëri të ditur gjithashtu se kishte diskutuar çështjen e ndërhyrjes ruse me kancelarin gjerman Friedrich Merz gjatë vizitës së tij në Gjermani në fillim të kësaj jave.

Ai vazhdoi: “Këto gjëra janë të rëndësishme tani për t’u deklaruar qartë dhe besoj se do t’i ndihmojnë votuesit në Gjermani dhe Francë të kuptojnë se një pjesë e kësaj politike është nxitur nga armiqtë tanë, përkatësisht Rusia.”