Mbi 200 lëkundje pasuese në Panama pas tërmetit 7.7 ballë, dëme në 900 shtëpi

Më shumë se 200 lëkundje pasuese janë regjistruar në Panama që kur një tërmet i fuqishëm me magnitudë 7.7 ballë goditi vendin të premten, duke dëmtuar qindra shtëpi dhe infrastrukturë dhe duke bërë që qeveria të shpallë gjendjen e jashtëzakonshme.

Deri më tani nuk është raportuar për vdekje, por 27 persona janë plagosur dhe rreth 900 shtëpi janë dëmtuar.

“Ne kemi regjistruar tashmë më shumë se 200 lëkundje pasuese… por magnituda e tyre po zvogëlohet dhe intervalet midis tyre po rriten”, tha për Nestor Luque, drejtor i institutit universitar të gjeoshkencës në Panama.

Shtetet e Bashkuara kanë premtuar 5 milionë dollarë ndihmë dhe po dërgojnë një ekip prej 20 anëtarësh në Panama për të ndihmuar me operacionet e shpëtimit dhe inspektimet e infrastrukturës, sipas ambasadorit të SHBA-së Kevin Mariño Cabrera.

Presidenti i Panamasë Jose Raul Mulino vizitoi disa nga zonat e goditura nga tërmeti dhe theksoi nevojën për riparime urgjente të rrugëve dhe urave për të lehtësuar shpërndarjen e ndihmës humanitare. Të paktën 14 ura në provincat Veraguas dhe Los Santos janë dëmtuar rëndë.

Shkollat ​​do të mbeten të mbyllura sot si masë paraprake, ndërsa autoritetet theksojnë se funksionimi i Kanalit të Panamasë nuk është prekur.