Robotët me inteligjencë artificiale po bëhen gati të marrin përsipër një nga punët më të lodhshme në supermarketet daneze: sistemimin dhe rimbushjen e produkteve në rafte. Një projekt eksperimental po zhvillohet aktualisht pranë Kopenhagenit, me synimin që makineritë të mund të punojnë në mënyrë të pavarur gjatë natës. Që prej qershorit, robotët po testohen në kushte reale brenda një supermarketi. Teknologjia zhvillohet nga kompania daneze Hive Robots, ndërsa makineritë janë prodhuar nga kompania kineze Unitree.
Në këtë fazë, robotët nuk janë ende plotësisht autonomë. Operatorë njerëzorë kontrollojnë dhe udhëheqin lëvizjet e tyre, duke u mësuar mënyrën se si duhet të kapin, transportojnë dhe vendosin në rafte produkte me forma, madhësi dhe pesha të ndryshme. Objektivi është që kjo fazë trajnimi të përfundojë gradualisht dhe, në fillim të vitit 2027, robotët të jenë në gjendje ta kryejnë procesin pa ndërhyrjen e vazhdueshme të stafit.
Plani parashikon që ata të aktivizohen kryesisht pas mbylljes së supermarketeve. Gjatë natës, robotët mund të lëvizin nëpër korridore dhe të furnizojnë raftet përpara se dyqani të hapet sërish për klientët. Automatizimi mund të ndryshojë ndjeshëm edhe mënyrën se si ndahet puna mes stafit. Aktualisht, punonjësit raportohet se shpenzojnë rreth 40-50% të ditës së punës duke transportuar dhe vendosur mallra nëpër rafte.
Nëse këtë proces e marrin përsipër makineritë, punonjësit mund të përqendrohen më shumë te komunikimi dhe shërbimi ndaj klientëve, në vend të punëve të përsëritura fizike. Ambiciet nuk përfundojnë vetëm me furnizimin e rafteve. Në të ardhmen, robotët mund të përdoren për të kontrolluar datat e skadencës së produkteve, për të evidentuar vendet ku mungojnë mallrat dhe për të identifikuar produkte që janë vendosur në raftin e gabuar.
Megjithatë, teknologjia është ende në fazën e provave. Robotët aktualisht i kryejnë disa procese më ngadalë se një punonjës dhe kanë nevojë për monitorim të vazhdueshëm. Një tjetër pengesë lidhet me legjislacionin. Përpara se robotë të tillë të lejohen të lëvizin dhe të punojnë në mënyrë autonome mes klientëve gjatë orarit të hapjes, mund të nevojiten ndryshime në rregullat daneze. Për këtë arsye, të paktën në fazën e parë, projekti është orientuar drejt punës gjatë natës, kur supermarketet janë bosh dhe robotët mund të kryejnë detyrat pa pasur kontakt të drejtpërdrejtë me blerësit.
