Puna me burrat i bën gratë të ndihen më keq për gabimet

Gabimet në punë janë të pashmangshme, por mënyra se si punonjësit i përjetojnë dhe i shohin ato ndryshon. Një studim i publikuar në Frontiers in Organizational Psychology tregon se gratë kanë më shumë gjasa t’i perceptojnë gabimet negativisht, veçanërisht kur punojnë në ambiente ku shumica e kolegëve janë burra.

Studiuesit nga London School of Economics anketuan më shumë se 1400 punonjës të sektorit financiar në Britani. Megjithëse 81% e pjesëmarrësve ishin gra, rezultatet treguan se gratë në ekipet ku të paktën tre të katërtat e punonjësve ishin burra ndiheshin më pak të sigurta për të pranuar gabimet dhe kishin më pak gjasa t’i shihnin ato si mundësi për të mësuar.

Në një shkallë nga 1 në 7, komoditeti për të pranuar gabimet ishte 5.46 për gratë, krahasuar me 5.94 për burrat në ekipet me shumicë meshkujsh. Gratë gjithashtu i shihnin më pak gabimet si mundësi për të mësuar, me një rezultat 4.20 kundrejt 4.54 për burrat.

Në ekipet ku gratë ishin shumicë, ky ndryshim zhdukej dhe qëndrimet e tyre ishin po aq pozitive ose edhe pak më pozitive se ato të burrave. Qëndrimet e burrave, ndërkohë, ndryshonin shumë pak në varësi të përbërjes gjinore të ekipit.

Studiuesit besojnë se ekipet shumë të dominuara nga burrat mund të krijojnë një kulturë presioni, perfeksionizmi dhe frike nga gabimet. Edhe pse gratë nuk prisnin më shumë ndëshkime formale se burrat, ato mund të kishin frikë nga pasoja jozyrtare, si humbja e besimit apo perceptimi si më pak kompetente.

Ekspertët theksojnë se kompanitë duhet të krijojnë një kulturë ku gabimet shihen si mundësi për të mësuar. Udhëheqësit mund ta ndihmojnë këtë duke folur hapur për gabimet e tyre dhe duke krijuar hapësira të sigurta ku punonjësit mund t’i diskutojnë ato. Një kulturë më tolerante ndaj gabimeve mund të nxisë inovacionin, vetëbesimin dhe zhvillimin në karrierë. /Phys – syri.net