I dënuar për vrasjen e tre personave, Sokol Hoxha kërkon të lirohet nga burgu: Kanë kaluar 26 vite nga dënimi
Sokol Hoxha, 51-vjeçari i ekstraduar nga Shtetet e Bashkuara të Amerikës, është paraqitur këtë të hënë në Gjykatën e Fierit, nën masa të rrepta sigurie. Ai kërkon shuarjen për shkak të parashkrimit të dënimit penal prej 25 vitesh burg, të dhënë në mungesë nga Gjykata e Fierit në vitin 2000, për vrasjen e dy vëllezërve Banaj në vitin 1997.
Hoxha, nga Patosi, kërkon të përfitojë nga mekanizmat e parashikuar në legjislacionin penal, duke pretenduar se ka kaluar afati për ekzekutimin e dënimit. Përveç dënimit të dhënë në Shqipëri, ai është dënuar me burgim të përjetshëm nga drejtësia belge për vrasjen e Brunilda Dervishit.
51-vjeçari u arrestua në Shtetet e Bashkuara të Amerikës në muajin maj, në kuadër të operacionit të koduar “Globi”, falë bashkëpunimit mes agjencive ligjzbatuese të Shqipërisë, Belgjikës dhe SHBA-së. Ai u ekstradua në Shqipëri më 6 gusht dhe u dërgua në burgun e Fierit për të vuajtur dënimin prej 25 vitesh burg të dhënë nga Gjykata e Fierit.
Megjithatë, duke pretenduar se kanë kaluar 26 vite nga dhënia e dënimit pa u ekzekutuar ai, Hoxha i është drejtuar gjykatës me kërkesën për parashkrimin e dënimit penal.
Seanca e zhvilluar një javë më parë u shty për ditën e sotme, me qëllim marrjen e informacionit nga Gjykata e Lartë lidhur me vendimmarrjen më të fundit për çështjen.
Përpara trupit gjykues, të përbërë nga gjyqtarja Aurora Tusha, prokurorja Malbora Dinaj dhe avokatët Toto Avdija e Rozeta Plaku, Hoxha do të paraqesë kërkesën për shuarjen e dënimit, e cila mund të ndikojë në vijimin e vuajtjes së tij në burg.
