Bashkimi Evropian vendosi të hënën sanksione ndaj gati 1600 individëve dhe kompanive ruse të lidhura me industrinë e armatimeve, duke vënë në shënjestër veçanërisht ata që dyshohet se janë përfshirë në prodhimin e pjesëve për dronë dhe raketa. Në listën më të gjerë të sanksioneve të vendosura ndonjëherë që kur Kremlini nisi luftën në shkallë të plotë kundër Ukrainës gati pesë vjet më parë, BE-ja vuri në shënjestër gjithashtu 77 persona të akuzuar për organizimin, punën ose kandidimin në "zgjedhje farsë" në territoret e pushtuara të Ukrainës. Duke njoftuar sanksionet, shefja e politikës së jashtme të BE-së, Kaja Kallas, tha se më shumë se gjysma e tyre "kanë të bëjnë me zinxhirin e prodhimit të raketave balistike që Rusia përdor për të vrarë civilë ukrainas çdo ditë". "Kjo nuk është koha për të lehtësuar presionin ndaj Moskës, por për ta shtuar atë," tha ajo. BE-ja deklaroi se kompanitë në fjalë gjenden në një listë të hartuar nga vetë qeveria ruse, "e cila i identifikon ato si pjesë të kompleksit ushtarako-industrial rus dhe, rrjedhimisht, u jep të drejtën për të përfituar subvencione". BE-ja i konsideron drejtuesit e këtyre kompanive si individë që "mbështesin kompleksin ushtarak dhe industrial të Rusisë". Ajo theksoi se sanksionet synojnë "furnizuesit e nivelit të mesëm që përbëjnë 'bërthamën' e industrisë ushtarake ruse". Komponentët që ata furnizojnë përfshijnë pajisje elektronike, pajisje komunikimi, sisteme radari dhe navigimi, sisteme satelitore dhe raketore, si dhe eksplozivë e municione.