Ronaldo: Jam më i miri i të gjitha kohërave, pikë

Cristiano Ronaldo ka rihapur debatin për lojtarin më të mirë të të gjitha kohërave, duke këmbëngulur se ai është futbollisti më i kompletuar në histori, pavarësisht preferencave të tifozëve për Lionel Messin, Pelén apo Diego Maradonën.

Ylli portugez, i cili së fundmi shënoi golin e tij të 980-të me Al Nassr, ka folur për objektivin e arritjes së 1.000 golave dhe për vlerësimin që merr për atë që po bën aktualisht në karrierën e tij.

“Njerëzit nuk po e vlerësojnë atë që po bëj tani. Ata janë më të shqetësuar se sa gola më duhen për të arritur 1.000. Nuk më pëlqen. Gjërat duhet të ndodhin natyrshëm”, ka deklaruar Ronaldo, sipas një raportimi të Alfredo Pedullà, i cili ia atribuon këto fjalë CNN Portugal.

Portugezi theksoi se nuk ka nevojë ta arrijë patjetër shifrën e 1.000 golave për ta konsideruar veten më të mirin e të gjitha kohërave.

“Nëse shënoj 920, 925 apo 930 gola, jam më i miri i të gjitha kohërave, pikë. Kur bëhet fjalë për shënimin e golave, numrat flasin vetë. Nuk do të thoja se duhet të arrij 1.000 gola. Nëse arrij atje, do të ishte fantastike”, ka thënë ai.

Ronaldo foli edhe për krahasimet me rivalët e tij historikë, Messin, Pelén dhe Maradonën, duke thënë se i respekton ata që kanë një preferencë tjetër, por nuk pranon pretendimet se ai nuk është një futbollist i kompletuar.

“Nëse dikush preferon Messin, Pelén ose Maradonën, kjo është çështje shijesh personale. E respektoj këtë. Por të thuash se Cristiano Ronaldo nuk është një lojtar i plotë është gënjeshtër. Unë jam lojtari më i plotë”, ka përfunduar ylli portugez.

Ronaldo, pesë herë fitues i Topit të Artë, vazhdon të ndjekë objektivin historik të 1.000 golave në karrierë, ndërsa debati për vendin e tij në historinë e futbollit mbetet një nga temat më të diskutuara mes tifozëve.