Milan-i “vuan” për gola, problem nuk është vetëm Ramos

Skuadra e Milan-it po përballet me një problem thelbësor në këtë fillim sezoni, dhe gjithçka lidhet me mungesën e theksuar të golave. Edhe pse kritikat shpesh bien mbi supet e sulmuesit Gonçalo Ramos, qoftë për "agjërimin" e tij përpara portës, apo për lëvizjet e tij taktike që e nxjerrin më shumë jashtë sesa brenda zonës së rreptësisë, e vërteta është se problemi i kuqezinjve është shumë më i gjerë.

Sipas statistikave, trajneri Ruben Amorim nuk ka në dispozicion asnjë qendërsulmues që mund të garantojë 20 gola në sezon, si dhe i mungojnë mesfushorët me tipare të theksuara shënuesi.

Sulmuesi portugez, Goncalo Ramos, shënoi 11 gola sezonin e kaluar në Francë, duke mbetur larg rekordit të tij prej 19 golash në sezonin 2022/2023. Lojtari më i rrezikshëm i kuqezinjve rezulton të jetë Pulisic, i cili edicionin e kaluar kontribuoi me 8 gola dhe 4 asiste.

Pas tyre, shifrat e pjesës tjetër të skuadrës janë mjaft të ulëta, me lojtarë si Chukwueze, Moreira, Rabiot, Musah, Cisse, Saelemaekers dhe Modric që ofrojnë një kontribut minimal.

Në total, nëntë lojtarët kryesorë ofensivë të Milanit grumbulluan vetëm 44 gola sezonin e kaluar, një mesatare prej më pak se pesë golash secili.

Kjo shifër është vetëm pak më shumë se dyfishi i golave të shënuar i vetëm nga Lautaro Martinez, duke nxjerrë në pah sfidën e madhe që e pret Amorim për të bërë fazën ofensive më efikase.