Autoritetet amerikane bastisin banesën e kongresmenes demokrate, kritike e madhe e Trump

Autoritetet amerikane kanë kryer një bastisje në banesën e kongresmenes demokrate Ilhan Omar, në zonën e Uashingtonit, në orët e para të mëngjesit të së hënës. Sipas Departamentit të Drejtësisë, operacioni është pjesë e një hetimi federal në vijim.

Lajmi u konfirmua nga një zëdhënës i Departamentit të Drejtësisë, i cili bëri të ditur se agjentët e Hetimeve të Sigurisë Kombëtare ekzekutuan një urdhër kontrolli të autorizuar nga gjykata.

Sipas raportimeve të Fox News, bastisja lidhet me një hetim penal për mashtrim të dyshuar në dokumentet e imigracionit të Ilhan Omarit. Dokumentet, sipas medias, ishin plotësuar nga babai i saj i ndjerë, kur ajo ishte ende fëmijë. Megjithatë, autoritetet nuk kanë dhënë detaje të mëtejshme mbi objektin e hetimit.

Përfaqësuesit e kongresmenes nuk iu përgjigjën menjëherë kërkesave për koment.

Bastisja në një moment të tensionuar politik

Ngjarja vjen në një periudhë tensionesh të forta politike në SHBA, pak më shumë se tri javë përpara zgjedhjeve të mesit të mandatit, të planifikuara për 3 nëntor. Në këto zgjedhje, republikanët e Presidentit Donald Trump synojnë të ruajnë shumicën e tyre të ngushtë në Kongres.

Ilhan Omar, e lindur në Somali dhe një nga zërat më kritikë ndaj Trumpit në Kongres, ka qenë vazhdimisht në shënjestër të deklaratave të ashpra të presidentit amerikan.

Ajo e ka cilësuar vëmendjen e vazhdueshme të Trumpit ndaj saj si një “obsesion të pashëndetshëm dhe të frikshëm”.

Presidenti amerikan ka kritikuar në mënyrë të përsëritur komunitetin somalezo-amerikan dhe ka përdorur gjuhë të ashpër ndaj emigrantëve dhe pakicave fetare. Këto deklarata kanë nxitur reagime nga organizata për mbrojtjen e të drejtave civile.

Në shkurt, Trump sulmoi publikisht Omarin dhe kongresmenen demokrate Rashida Tlaib, e cila është gjithashtu myslimane, pasi të dyja e kritikuan gjatë fjalimit të tij për Gjendjen e Kombit, ku presidenti mbrojti politikat e administratës së tij për imigracionin.

Deri më tani, Departamenti i Drejtësisë nuk ka bërë publike hollësi të tjera mbi hetimin dhe nuk është konfirmuar nëse ndaj kongresmenes janë ngritur akuza penale.