PS votoi 85 vota për bashkitë, deputetja Mila: S’kemi detyrim të votojmë ndryshe për t’i provuar dikujt vlerën e kartonit tonë

Deputetja e PS-së, Sara Mila mbron qëndrimin e grupit parlamentar dhe disiplinën në votimin me 85 vota për hartën e re Territoriale. Ajo theksoi se vota e deputetëve nuk duhet të shihet si çështje personale, por në kuadër të vendimmarrjes së grupit parlamentar.

“Ne nuk kemi detyrim të votojmë ndryshe për t’i provuar dikujt se sa vlen kartoni politik që kemi, i cili nuk duhet të jetë personal dhe unë nuk e gjykoj si të tillë. Ne kemi ndjekur një rregull disiplinor, të cilin e shohim të zbatohet shpesh në Bundestag apo në Parlamentin britanik. Nuk kam komplekse të mendoj ndryshe kur kam mendime pro dhe kundër kryetarit. Unë kam besim absolut se kryetari im nuk voton kundër Shqipërisë dhe nuk e mendoj të arsyeshme të hedh një votë kundër”, u shpreh Mila.

Duke iu referuar votimit të reformës territoriale në vitin 2015, ajo ngriti pikëpyetje për qëndrimin e opozitës së atëhershme dhe mënyrën se si funksionon disiplina në grupet parlamentare. “Në vitin 2015 ndodhi një reduktim në numra. Ajo që do të dëshiroja të shtroja si pyetje është, a nuk vlen e njëjta logjikë edhe në anën tonë të majtë të parlamentit? Pse nuk doli një deputet nga opozita që të votonte pro (i referohet votimit 2026)? Praktikisht, edhe PD-ja ka bërë të njëjtën gjë, ka ndjekur grupin. Po flas për parimin”, deklaroi ajo.

E pyetur nga Grida Duma se për cilin qëndrim të kryetarit të partisë deri tani ka pasur mendim kundër, Mile theksoi se deri më tani nuk ka pasur raste kur të ketë votuar kundër qëndrimit të kryetarit, duke argumentuar se vendimmarrja për çështje të tilla duhet parë si vendim i grupit parlamentar dhe jo si një urdhër individual. “Deri tani nuk më ka ndodhur të jem kundër, sepse nuk ka pasur arsye të jem kundër kryetarit. Ajo që ndodh nuk ka pse të gjykohet si vendim i kryetarit, kur është vendim i grupit parlamentar të PS-së. Sikurse edhe vendimi kundër i palës tjetër, të opozitës, ishte vendim i grupit”, përfundoi Mila.