Ndahet nga jeta në moshën 34-vjeçare aktori i “Breaking Bad”, RJ Mitte
Aktori amerikan RJ Mitte, i njohur për rolin e Walter “Flynn” White Jr në serialin e famshëm “Breaking Bad”, është ndarë nga jeta në moshën 34-vjeçare.
Lajmi i trishtë është konfirmuar nga përfaqësuesi i tij për BBC-në, i cili e përshkroi aktorin si një artist të dashur dhe një zë të rëndësishëm në mbrojtje të të drejtave të personave me aftësi të kufizuara.
Mitte ndërroi jetë në Brownsville, Teksas, më 12 tetor. Sipas autoriteteve lokale, shkaku dhe rrethanat e vdekjes nuk janë përcaktuar ende, ndërsa hetimet vijojnë. Sakaq pritet të kryhet edhe autopsia.
Roli që e bëri të famshëm në “Breaking Bad”
RJ Mitte u bë i njohur në mbarë botën përmes rolit të Walter White Jr, djalit të personazhit kryesor Walter White, interpretuar nga Bryan Cranston, në serialin fitues të çmimeve Emmy, “Breaking Bad”.
Seriali u transmetua për pesë sezone, nga viti 2008 deri në vitin 2013, dhe u shndërrua në një prej produksioneve më të vlerësuara televizive të kohës.
Mitte jetonte me paralizë cerebrale, një përvojë personale që e ndihmoi t’i jepte më shumë autenticitet personazhit të tij. Për interpretimin në serial, ai u vlerësua edhe me një çmim të Shoqatës së Aktorëve të Ekranit (SAG) në vitin 2014.
Lajmi për vdekjen e aktorit ka prekur kolegët me të cilët ndau ekranin gjatë viteve të xhirimeve të “Breaking Bad”.
Bryan Cranston, i cili interpretoi të atin në serial, shprehu dhimbjen e thellë për humbjen e tij në një mesazh në Instagram.
Ai kujtoi se e kishte takuar Mitte kur ishte vetëm 14 vjeç, në kohën kur u përzgjodh për rolin e Walter White Jr, dhe theksoi se gjatë viteve kishte parë rritjen e tij si aktor.
Cranston vlerësoi gjithashtu angazhimin e tij për përfaqësimin e personave me aftësi të kufizuara në industrinë e filmit dhe televizionit.
Edhe Aaron Paul, i njohur për rolin e Jesse Pinkman, shprehu pikëllimin për ndarjen e parakohshme nga jeta të kolegut të tij, duke e kujtuar me fjalë të përzemërta.
Ndërkohë, Dean Norris, i cili interpretoi Hank Schrader në serial, e përshkroi Mitte si një djalë të dashur, për të cilin ishte kujdesur gjatë kohës që punonin së bashku.
Përtej karrierës së tij si aktor, RJ Mitte u angazhua për rritjen e ndërgjegjësimit dhe përfaqësimin e personave me aftësi të kufizuara.
Ai shërbeu si ambasador për organizatat United Cerebral Palsy dhe Shriners Children’s, si dhe krijoi fondacionin e tij, The Mitte Foundation, për të mbështetur nisma filantropike dhe projekte në komunitet.
Mitte kërkoi vazhdimisht që personat me aftësi të kufizuara të mos kufizoheshin nga stereotipat dhe të kishin mundësi të barabarta në ekran dhe në shoqëri.
Përveç “Breaking Bad”, ai u shfaq edhe në produksione të tjera televizive, përfshirë “Hannah Montana” dhe “Switched at Birth”.
