Dy punonjës të Policisë së Shtetit me detyrë në Komisariatin Nr. 4 në Tiranë janë arrestuar nga Agjencia e Mbikëqyrjes Policore nën dyshimet për korrupsion pasiv dhe shpërdorim detyre. Sipas AMP-së, dy efektivët të moshave 20 dhe 23 vjeç, dyshohet se i kanë kërkuar dhe marrë një qytetari 20 mijë lekë, në këmbim të mosndëshkimit për një shkelje rrugore. Hetimi ka nisur pas kallëzimit të një qytetari. Nga veprimet hetimore dyshohet se punonjësit e Policisë me detyrë Inspektor i kanë kërkuar dhe marrë një shumë prej 20.000 lekësh në mënyrë që mos të ndëshkohej për shkeljen rrugore. Dy punonjësit e policisë akuzohen për veprat penale ‘Korrupsioni pasiv i personave që ushtrojnë funksione publike’ dhe ‘Shpërdorimi i detyrës’, kryer në bashkëpunim. Ndërkohë, hetimet vijojnë për dokumentimin e plotë të rastit dhe identifikimin e personave të tjerë që mund të jenë të përfshirë në këtë çështje.