Konsultimet e partive politike me Komisionerin Shtetëror të Zgjedhjeve të premten përfunduan pa një konsensus për shtrirjen e përdorimit të votimit elektronik në zgjedhjet e reja vendore.
Partia Demokratike, si partia më e madhe e opozitës, shprehur mosbesim në zbatimin e këtij sistemi.
Në takimin konsultativ të kërkuar nga Komisioneri Ilirian Celibashi morën pjesë përfaqësues të Partisë Socialiste, Partisë Demokratike, Partisë Republikane, Partisë Bashkimi për të Drejtat e Njeriut, Partisë Fryma Re Demokratike, Lëvizja “Shqipëria Bëhet”, Partia Agrare Ambjentaliste dhe PartisëLëvizja e Legalitetit.
“Nga diskutimet përkatëse të këtyre përfaqësuesve, duket se partia kryesore e opozitës parlamentare nuk e mbështet zgjerimin e votimit dhe numërimit elektronik për zgjedhjet për organet e qeverisjes vendore të vitit 2027”- njoftoi pas takimit Komisioni Qendror i Zgjedhjeve.
Sipas KQZ-së, “rekomandimi i përfaqësuesve të tjerë politikë ishte për zbatimin e votimit dhe numërimit elektronik në disa bashki apo edhe në të gjithë territorin e vendit”.
Celibashi propozoi shtrirjen e votimit dhe numërimit elektronik në 3-4 bashki të mëdha në zgjedhjet e ardhshme propozim që u prit me rezerva nga partitë opozitare kryesisht për shkaqe sigurie të serverave dhe mosbesimit në institucionin e AKSHI-it për mirëmbajtjen e tyre.
Kreu i PD-së, Sali Berisha, deklaroi qëndrimin kundër duke e konsideruar votimin dhe numërimin elektronik të manipulueshëm.
“Në asnjë bashki nuk pranojmë ne numërim elektronik, në mënyrë të prerë”- tha ai duke shtuar se “numërimi elektronik është manipuluar në mënyrë të turpshme”.
Ai akuzoi se në numërimin elektronik është implikuar direkt dhe Shërbimi Informativ Kombëtar. Ai pretendoi se “janë krijuar servera paralelë, ka patur probleme të mëdha, ne nuk pranojmë asgjë të manipulueshme më në procesin zgjedhor”.
Ndërkohë, Partia Socialiste në pushtet e ka mbështetur në parim shtrirjen e këtij mekanizmi në zgjedhjet e ardhshme.
Votimi elektronik në Shqipëri u përdor për herë të parë si pilot në zgjedhjet parlamentare të prillit 2021, në 32 qendra votimi në Njësinë Administrative nr. 10 në Tiranë, ndërsa në zgjedhjet e pjesshme të 6 marsit 2022 u shtri në të gjithë Bashkinë Vorë.
Në zgjedhjet vendore të 2023-it, sistemi u zgjerua në 401 qendra votimi në Elbasan, Kamëz dhe Vorë, duke përfshirë mbi 300 mijë zgjedhës, por u shoqërua me probleme teknike dhe vonesa në nxjerrjen e rezultateve.
