Sekuestrohen 3.7 tonë kokainë në brigjet e Faros në Portugali, një trafikant i vdekur dhe dy të arrestuar

Autoritetet portugeze kanë sekuestruar 3.7 ton kokainë në brigjet e Faros, në Algarve, pas një operacioni ndërkombëtar kundër trafikimit të drogës.

Në një deklaratë, Policia Gjyqësore (PJ) tha se sekuestrimi, i kryer të dielën, erdhi pas “një hetimi që çoi në shpërbërjen e një grupi kriminal të dedikuar për futjen e sasive të mëdha të drogës në kontinentin evropian përmes përdorimit të anijeve me shpejtësi të lartë”.

Droga ndodhej në bordin e një mjeti të tillë lundrues, i cili u “zbulua dhe u ndalua rreth 80 milje detare në jug të Faros”. Hetuesit sekuestruan gjithashtu “objekte të ndryshme të përdorura për lundrimin dhe transportin” e ngarkesës.

Duke folur në një konferencë për shtyp të hënën, Joao Oliveira, kreu i Prokurorisë së Përgjithshme në Lisbonë, e përshkroi grupin si “një tjetër organizatë kriminale ndërkombëtare” që synon të sjellë sasi të mëdha kokaine në Evropë.

Ai vuri në dukje mbështetjen e tyre te “narkolança”, një motoskaf i përdorur për trafikimin e drogës, e cila është një metodë e përdorur gjerësisht kohët e fundit.

Sipas Oliveirës, autoritetet ishin njoftuar për një mjet lundrues që “ishte tashmë në radarët tanë si i dyshimtë”. Efektivët iu afruan mjetit në ujërat e hapura, ku ndaluan një ekuipazh prej tre të dyshuarish.

Ekuipazhi injoroi urdhrat e autoriteteve dhe gjatë ndjekjes ndodhi një përplasje. Një i dyshuar u plagos rëndë dhe më vonë vdiq.

Dy të tjerët, të dy shtetas të huaj, u arrestuan dhe do të dalin para një gjyqtari në Kampusin e Drejtësisë në Lisbonë, ku do të vendoset për çdo akuzë të mundshme dhe paraburgim.

Operacioni me emrin e koduar “Mare Nostrum”, u krye nën drejtimin e Qendrës së Analizës dhe Operacioneve Detare, Narkotikë (MAOC-N), në koordinim me Marinën Portugeze, Policinë Detare, Guardia Civil të Spanjës dhe Guardia di Finanza të Italisë.