Protesta e studentëve dhe të rinjve para Ministrisë së Arsimit në Tiranë u shoqërua me përplasje mes një pjese të demonstruesve dhe policisë, pasi protestuesit hodhën sende drejt godinës dhe dëmtuan rrethimin e saj.
Policia përdori autobotin me ujë dhe gaz lotsjellës për të shpërndarë turmën, ndërsa të paktën 23 protestues janë shoqëruar, sipas zëdhënësit të Policisë së Shtetit.
Ministri i Brendshëm, Ervin Demo, deklaroi se gjashtë efektivë të Policisë së Shtetit kishin mbetur të plagosur gjatë kryerjes së detyrës dhe dënoi dhunën ndaj tyre.
“Goditja e një punonjësi policie nuk është ushtrim i së drejtës për të protestuar”, u shpreh Demo, duke u bërë thirrje pjesëmarrësve të ruajnë qetësinë dhe të kontribuojnë në uljen e tensioneve.
Ai shtoi se policia do të vijojë të garantojë rendin dhe sigurinë, duke respektuar të drejtën për protestë paqësore dhe duke vepruar me profesionalizëm, përmbajtje dhe në përputhje me ligjin.
Tubimi ishte thirrur në orën 14:00, me një apel për pjesëmarrjen e studentëve nga i gjithë vendi. Pjesëmarrësit kërkuan kushte më të mira për arsimin dhe hodhën slogane kundër qeverisë së kryeministrit Edi Rama.
“Duam kushte, duam dije, jo pallavra qeverie”, ishte një nga thirrjet e protestuesve, të cilët ngritën shqetësime për vështirësitë ekonomike dhe largimin e të rinjve nga Shqipëria.
Protestuesit hodhën vezë drejt Ministrisë së Arsimit, ndërsa disa syresh shkulën kangjellat dhe pllakat e trotuarit dhe goditën xhamat e ndërtesës me gurë.
Gjatë ndërhyrjes, policia shtyu një pjesë të turmës përgjatë Rrugës së Durrësit, ndërsa mediat publikuan pamje ku shfaqen efektivë policie duke tërhequr zvarrë një protestues dhe duke e goditur me shkop gome.
Sipas Ministrisë së Shëndetësisë 13 persona janë paraqitur për ndihmë mjekësore në Qendrën Spitalore Universitare Nënë Tereza.
Pas publikimit të një videoje ku shfaqej një 19-vjeçar me këmbë të thyer, i cili transportohej nga disa policë me uniformë pranë Parlamentit, në një mënyrë që ngjante me bartjen e një thesi me patate, Drejtori i Përgjithshëm i Policisë së Shtetit urdhëroi pezullimin e menjëhershëm nga detyra të katër efektivëve dhe shefit të Rendit në Komisariatin Nr. 1 në Tiranë.
Drejtoria e Standardeve Profesionale ka nisur hetimin disiplinor ndaj punonjësve të pezulluar, ndërsa Agjencia e Mbikëqyrjes Policore, në bashkëpunim me Prokurorinë, ka filluar hetimet për rastin.
Policia njoftoi gjithashtu ngritjen e një grupi të posaçëm për të analizuar veprimet e efektivëve gjatë gjithë protestës dhe për të vlerësuar nëse janë respektuar procedurat standarde të punës.
“Çdo punonjës që ka shkelur procedurat apo ka tejkaluar kompetencat do të mbajë përgjegjësi”, deklaroi Policia e Shtetit.
Kërkesa për hetimin e dhunës
Komiteti Shqiptar i Helsinkit (KShH) shprehu shqetësim për dhunën gjatë protestës, duke bërë të ditur se, sipas raportimeve dhe vëzhguesve të tij në terren, ishin lënduar protestues, punonjës policie dhe gazetarë. Organizata dënoi dhunën nga cilado palë dhe bëri thirrje për përmbajtje.
“Aktet e dhunës të kryera nga individë të caktuar nuk mund të shërbejnë si justifikim për trajtimin e të gjithë pjesëmarrësve si persona të dhunshëm”, theksoi KShH, ndërsa shtoi se e drejta e protestës nuk legjitimon dhunën ndaj policëve, gazetarëve apo personave të tjerë.
Organizata kërkoi që përdorimi i forcës nga policia të respektojë parimet e ligjshmërisë, domosdoshmërisë dhe proporcionalitetit. Ajo shprehu shqetësim të veçantë për raportimet mbi lëndimin e gazetarëve dhe kërkoi garantimin e sigurisë së tyre gjatë raportimit.
KShH u bëri thirrje institucioneve të hetojnë në mënyrë efektive dhe të pavarur të gjitha incidentet dhe pretendimet për përdorim të tepruar të forcës, si dhe të garantojnë transparencë për personat e shoqëruar apo të ndaluar dhe respektimin e të drejtave të tyre procedurale.
Ndërhyrja e policisë u kritikua edhe nga deputetë të opozitës.
Deputeti i Lëvizjes Bashkë, Redi Muçi, e cilësoi dhunën ndaj studentëve si “akti i fundit i një autokracie të mykur” dhe deklaroi se pushtetit të Edi Ramës i kishte ardhur fundi. Sipas tij, të rinjtë protestojnë sepse kërkojnë standarde të ngjashme me ato në vendet evropiane.
Deputetja e pavarur, Marjana Koçeku, iu drejtua ministrit të Brendshëm, duke i kërkuar të ndalojë dhunën ndaj studentëve dhe të trajtojë padrejtësitë që, sipas saj, i shtynë ata të dalin në protestë.
“Dhuna kundër studentëve nuk duhet të jetë suksesi jot i parë pas ardhjes në detyrë si Ministër i Brendshëm”, u shpreh Koçeku.
Kryetari i Partisë Mundësia, Agron Shehaj, dënoi atë që e cilësoi si “dhunë brutale” ndaj studentëve dhe kërkoi dorëheqjen e kryeministrit.
“Edi Rama duhet të mbajë përgjegjësi dhe të japë dorëheqjen! Kush prek studentët, prek të ardhmen e Shqipërisë!”, u shpreh Shehaj.
Protesta e studentëve vjen pas më shumë se katër muajsh tubimesh kundër qeverisë në Tiranë, të nxitura fillimisht nga kundërshtimi ndaj projektit turistik në Zvërnec dhe shqetësimet për mbrojtjen e mjedisit e të pronës.
Protestuesit i zgjeruan kërkesat, duke përfshirë dorëheqjen e qeverisë së Edi Ramës dhe shfuqizimin e ndryshimeve ligjore për zonat e mbrojtura dhe investitorët strategjikë.
Tubimet dhe marshimet në kryeqytet kanë vijuar gjatë verës dhe vjeshtës, ndërsa largimi i qeverisë ka mbetur një nga kërkesat kryesore të pjesëmarrësve.
