Nën masa të rrepta sigurie ka nisur seanca gjyqësore në Gjykatën e Apelit të Juridiksionit të Përgjithshëm pë...
AKTUALITET
Pjesa e sipërme e Rrugës së Durrësit mbulohet nga tymi, vijojnë tensionet dhe përdorimi i gazit lotsjellës
PiranjatPërditësimi i fundit 13 Tetor 2026, 16:54
Situata në protestën e studentëve në Tiranë vijon të shoqërohet me tensione. Pjesa e sipërme e Rrugës së Durrësit është mbuluar nga tymi, ndërsa forcat e policisë vijojnë të përdorin gaz lotsjellës për të shpërndarë protestuesit. Pjesa e sipërme e Rrugës së Durrësit në Tiranë është mbuluar nga tymi, ndërsa vijojnë tensionet mes protestuesve dhe forcave të policisë në kuadër të protestës së studentëve, e cila nisi pasditen e sotme para Ministrisë së Arsimit.
Sipas informacioneve nga terreni, në zonë vijon përdorimi i gazit lotsjellës, ndërsa efektivët e policisë po përpiqen të shpërndajnë turmën dhe ta zhvendosin atë në drejtim të qendrës së kryeqytetit.
Tymi ka mbuluar një pjesë të konsiderueshme të segmentit rrugor, ndërsa protestuesit vijojnë të qëndrojnë në zonë, pavarësisht ndërhyrjeve të forcave të rendit. Situata vjen pas disa orësh protestë, gjatë së cilës janë regjistruar përplasje të herëpashershme mes pjesëmarrësve dhe policisë. Më herët, efektivët përdorën ujë me presion dhe spraj me piper, ndërsa protestuesit hodhën gurë, fishekzjarrë dhe sende të tjera në drejtim të godinës së Ministrisë së Arsimit dhe forcave të rendit.
Gjatë protestës, një grup pjesëmarrësish ndezën gjithashtu një zjarr në mes të rrugës, duke djegur kuti kartoni dhe objekte të tjera.
Forcat e policisë kanë vendosur kordonë sigurie në disa pika përgjatë Rrugës së Durrësit, ndërsa ndërhyrjet kanë sjellë zhvendosjen e vazhdueshme të protestuesve nga një segment i rrugës në tjetrin. Pavarësisht përpjekjeve për shpërndarjen e turmës, protesta vijon, ndërsa situata në pjesën e sipërme të Rrugës së Durrësit mbetet e tensionuar.
Ende nuk ka një bilanc zyrtar lidhur me numrin e personave të shoqëruar apo të lënduar gjatë përplasjeve.
