Një ndeshje e kategorisë së dytë në Argjentinë përfundoi mes kaosit dhe protestave, pasi arbitri ndryshoi vendimin për një penallti vetëm pasi futbollistët i treguan pamjet e aksionit në celular.
Përballja mes All Boys dhe Godoy Cruz nisi me 30 minuta vonesë për shkak të përplasjeve mes tifozëve vendas dhe policisë. Por momenti më i pazakontë ndodhi në fund të takimit, kur gjyqtari Nicolás Lamolina akordoi një penallti për miqtë, megjithëse pamjet tregonin se faulli ishte kryer jashtë zonës.
Lojtarët dhe pjesëtarët e All Boys rrethuan arbitrin dhe i shfaqën në telefon përsëritjen e aksionit. Ndeshja u ndërpre për plot 26 minuta, ndërsa rreth 100 tifozë hynë në fushë.
Pas rikthimit të qetësisë, Lamolina anuloi penalltinë dhe akordoi goditje dënimi jashtë zonës. Ai shpjegoi se ishte njoftuar për gabimin nga asistenti i tij, ndërsa futbollistët e Godoy Cruz kundërshtuan vendimin.
Më herët, në minutën e 68-të, arbitri kishte akorduar një tjetër penallti për Godoy Cruz, pas një prekjeje të dyshuar me dorë. Megjithatë, Martín Pino nuk arriti ta shndërronte në gol.
Ndeshja përfundoi 0-0, por episodi la pas një situatë të pazakontë: pa sistemin VAR, përsëritja në celularët e lojtarëve u bë pjesë e një vendimi që ndryshoi rrjedhën e minutave të fundit.