Bashkimi Europian mbështet një armëpushim mes Rusisë dhe Ukrainës për ndalimin e sulmeve ndaj infrastrukturës energjetike, por kërkon që marrëveshja të respektohet nga të dyja palët. Përfaqësuesja e Lartë e BE-së për Politikën e Jashtme, Kaja Kallas, theksoi se një armëpushim i njëanshëm nuk mund të funksionojë.
“Armëpushimi nuk mund të funksionojë nëse e respekton vetëm njëra palë”, deklaroi Kallas në Luksemburg, pas mbledhjes së Këshillit të Punëve të Jashtme të BE-së.
Ajo bëri të ditur se ministrat e Jashtëm të vendeve anëtare shprehën mbështetje për ndalimin e goditjeve ndaj objekteve energjetike në të dyja vendet, me kusht që edhe Moska të angazhohet për respektimin e tij.
Kallas nënvizoi se nuk është momenti për të lehtësuar presionin ndaj Rusisë. Në këtë kuadër, ajo përmendi shtimin e afro 1.600 individëve dhe subjekteve në listat e sanksioneve që synojnë kompleksin ushtarako-industrial rus. Sipas saj, masat po e bëjnë prodhimin e armëve në Rusi më të vështirë, më të ngadaltë dhe më të kushtueshëm.
Kryediplomatja europiane njoftoi gjithashtu se gjatë kësaj jave BE-ja do të sigurojë financime shtesë për Ukrainën, të destinuara për blerjen e dronëve dhe raketave.
Ajo përshëndeti edhe miratimin nga Kievi të legjislacionit të nevojshëm për hapjen e pritshme të dy grupkapitujve në negociatat e anëtarësimit në BE.
Nga ana e tij, presidenti ukrainas Volodymyr Zelensky deklaroi se Ukraina është e gatshme të respektojë një armëpushim për infrastrukturën energjetike, por paralajmëroi se do të përgjigjet nëse Rusia vijon sulmet. Sipas tij, forcat ruse kishin goditur objekte energjetike në Ukrainë, përfshirë një impiant të prodhimit të gazit.