Fluturimet në aeroportin e Nurembergut, në Gjermani, u pezulluan përkohësisht pas një alarmi për një emergjencë të mundshme në bordin e një avioni që vinte nga Korfuzi i Greqisë. Avioni u ul në mënyrë të sigurt dhe, pas kontrolleve, policia konfirmoi se nuk kishte rrezik për pasagjerët dhe ekuipazhin.
Bëhet fjalë për fluturimin XR456 të kompanisë “Corendon Airlines”. Shqetësimi u ngrit pasi nga kabina e pilotëve u transmetua kodi 7500, i cili në aviacion përdoret për të sinjalizuar një rrëmbim avioni. Më pas, pilotët nuk mund të kontaktoheshin përmes radios, duke shtuar dyshimet për një situatë të mundshme emergjente.
Autoritetet gjermane aktivizuan masat e sigurisë, ndërsa avionë luftarakë “Eurofighter” shoqëruan avionin gjatë fluturimit në hapësirën ajrore gjermane.
Sipas raportimeve të “Reuters” dhe mediave gjermane, dyshohet se alarmi u shkaktua nga një defekt i përkohshëm në sistemin e komunikimit me radio. Kompania ajrore deklaroi se nuk kishte ndodhur asnjë situatë emergjente dhe se pasagjerët, ekuipazhi dhe avioni nuk ishin vënë në rrezik.
Rreth orës 13:20, sipas orës lokale, policia konfirmoi se situata ishte e sigurt. Aeroporti rifilloi më pas funksionimin normal. Pas uljes, pasagjerët qëndruan për një periudhë në avion, përpara se të shoqëroheshin me autobusë drejt terminalit të mbërritjeve.
Incidenti ndodhi pas një tjetër alarmi në të njëjtin aeroport, në orët e para të mëngjesit, kur tre pilotë raportuan veçmas se kishin parë një objekt që mund të ishte dron pranë aeroportit. Kontrollet e policisë nuk konfirmuan praninë e tij.
Për shkak të këtij raportimi, gjashtë fluturime pësuan vonesa, ndërsa dy avionë që po shkonin drejt Nurembergut u devijuan përkohësisht drejt Këlnit dhe Pragës. Autoritetet nuk kanë konfirmuar ndonjë lidhje mes dy incidenteve.