Presidenti amerikan Donald Trump deklaroi se si Vladimir Putin, ashtu edhe Volodymyr Zelenskyy, dëshirojnë t’i japin fund luftës në Ukrainë, por sipas tij, të dyja palët nuk dinë si të arrijnë një marrëveshje.
I pyetur nga gazetarët se pse beson se presidenti rus dëshiron përfundimin e luftës, Trump iu referua përvojës së tij në negociata.
“Ajo që kam bërë gjatë gjithë jetës sime janë marrëveshjet. Mendoj se Putin dëshiron, ndoshta”, u shpreh ai.
Trump shtoi se armiqësia mes dy liderëve e vështirëson arritjen e një zgjidhjeje, por pretendoi se administrata e tij do t’i ndihmojë të kapërcejnë këtë pengesë.
“Të dy duan që kjo të përfundojë dhe nuk dinë si të arrijnë deri te kjo pikë. Mes tyre ka shumë urrejtje. Ne do t’i çojmë deri aty”, tha presidenti amerikan përpara nisjes drejt Alaskës, ku kishte planifikuar një vizitë në kuadër të fushatës.
Trump hodhi poshtë gjithashtu pretendimet se Shtetet e Bashkuara kanë ndërprerë shkëmbimin e informacioneve të inteligjencës me Ukrainën.
“Jo, nuk e kemi bërë këtë. Ne i ndihmojmë, por në të vërtetë po i ndihmojmë të arrijnë një zgjidhje përfundimtare”, deklaroi ai, duke shtuar se Uashingtoni vijon të ndajë informacione inteligjence me Kievin.