Mbi 2 mijë studentë në Bolonjë kanë mbetur pa një vend në konvikte, duke nxitur protesta kundër kostos së lartë të jetesës dhe vështirësive për të përballuar studimet. Në shenjë kundërshtimi, studentët kanë ngritur çadra në sheshin Scaravilli, duke paralajmëruar se do të qëndrojnë aty deri në nisjen drejt Romës, ku të shtunën është planifikuar një demonstratë kombëtare.
Protesta organizohet nga Rrjeti Universitar – Udu dhe është pjesë e një mobilizimi në disa universitete italiane, me qendër në Montecitorio, në kryeqytet.
Përfaqësuesit e Udu thonë se kostoja e jetesës po e shndërron arsimin e lartë në një mundësi të arritshme vetëm për një pjesë të shoqërisë. Sipas tyre, tregu privat i banesave është bërë gjithnjë e më i papërballueshëm, ndërsa një dhomë teke në Bolonjë kushton mesatarisht 585 euro në muaj.
Gjatë ditës së parë të protestës, studentët shpërndanë fletëpalosje dhe përgatitën banderola për demonstratën e së shtunës. Po ashtu, zhvilluan një asamble publike ku morën pjesë edhe përfaqësues të sindikatës së qiramarrësve Sunia-CGIL.
Mbi 2 mijë aplikantë pa vend në konvikte
Sipas Rrjetit Universitar, më shumë se 2 mijë studentë që kanë aplikuar për strehim përmes institucionit rajonal Er.Go nuk kanë përfituar një vend në konvikte. Studentët ia atribuojnë këtë situatë mungesës së ofertës së përballueshme dhe spekulimeve në tregun e banesave.
Ata theksojnë se vështirësitë financiare nuk lidhen vetëm me qiratë, por edhe me faturat e energjisë, transportin dhe ushqimet. “Sot një student duhet të zgjedhë nëse do të blejë vaj apo një libër për të dhënë provimin”, shprehen përfaqësuesit e Rrjetit Universitar, duke përshkruar presionin ekonomik me të cilin përballen të rinjtë.
Kërkohet fond prej 2 miliardë eurosh për universitetet
Studentët kërkojnë investime afatgjata për arsimin e lartë dhe propozojnë krijimin e një fondi kombëtar prej 2 miliardë eurosh. Sipas tyre, këto para duhet të shërbejnë për ta bërë universitetin falas dhe për të garantuar mbulimin e plotë të bursave për të gjithë studentët që plotësojnë kriteret.
Të dhënat e paraqitura nga organizatorët tregojnë se në rajonin Emilia-Romagna janë 38.198 studentë që plotësojnë kushtet për përfitimin e bursave.
“Ne duam t’i tregojmë klasës politike se, nëse zgjidhja e saj është braktisja e së drejtës për arsim dhe kalimi i pasurisë publike te privatët, ne nuk jemi dakord”, deklarojnë përfaqësuesit studentorë.
Protestat pritet të vijojnë në ditët në vijim, ndërsa studentët kërkojnë masa konkrete për strehim të përballueshëm, bursa dhe mundësi të barabarta për të ndjekur universitetin.