Gazetari Lutfi Dervishi e cilësoi protestën e sotme në Tiranë si një moment që kërkon analizë dhe reflektim, duke argumentuar se mënyra se si Policia e Shtetit menaxhoi situatën ndryshoi dinamikën e ngjarjeve.
I ftuar në emisionin “Off the Record” në A2 CNN, Dervishi tha se, megjithëse aktet e para të dhunës erdhën nga protestuesit, përshkallëzimi i mëtejshëm lidhej, sipas tij, me mënyrën e ndërhyrjes së forcave të rendit.
Ai kritikoi veçanërisht përfshirjen e forcave “Shqiponja” në përballjet me protestuesit, duke theksuar se misioni i tyre nuk është menaxhimi i tubimeve. Sipas gazetarit, policia duhet të identifikojë personat problematikë, të koordinojë ndërhyrjet dhe të përdorë forcën në mënyrë proporcionale.
“Dhuna ka filluar nga protestuesit, përshkallëzimi ka ardhur për shkak të policisë”, u shpreh Dervishi, duke e cilësuar situatën si tregues të paaftësisë për të menaxhuar edhe një protestë të dhunshme.
Gazetari vuri në pikëpyetje edhe rolin e drejtuesve të policisë, të cilët, sipas tij, duhet të jenë përgjegjës për koordinimin e efektivëve dhe dialogun me organizatorët e protestës, në vend që të përfshihen drejtpërdrejt në kapjen e protestuesve.
Përtej përplasjeve, Dervishi u ndal te arsyet që, sipas tij, i kanë nxjerrë sërish studentët në rrugë, duke krahasuar protestat e vitit 2018 me ato të vitit 2026.
Ai përmendi rritjen e kostos së jetesës, çmimet, vështirësitë për strehim dhe kërkesat e studentëve që, sipas tij, ende nuk kanë marrë përgjigje të plota, përfshirë konviktet, kartën e studentit dhe përmirësimin e infrastrukturës universitare.
“Qyteti mund të jetë më i bukur, por është bërë i papërballueshëm për ta”, deklaroi gazetari, duke theksuar hendekun mes kostos së jetesës dhe nivelit të pagave.
Sipas tij, protestat nuk mund të trajtohen thjesht si një problem rendi, pasi pas tyre qëndrojnë shqetësime sociale dhe ekonomike që kërkojnë zgjidhje konkrete.
Në përfundim, Dervishi kërkoi reflektim politik dhe kritikoi mënyrën se si, sipas tij, autoritetet po i përgjigjen pakënaqësisë qytetare.
Ai kundërshtoi përdorimin e etiketave ndaj protestuesve, duke paralajmëruar se cilësimi i tyre si huliganë apo persona të manipuluar nuk zgjidh problemet që i kanë nxjerrë në rrugë.
“Njerëzit duhen dëgjuar jo për t’ia hedhur, por duhen dëgjuar se kanë hall, se nuk kanë dalë për qejf në rrugë”, u shpreh gazetari.
Për Dervishin, ngjarjet e sotme përbëjnë një pikë kthese që kërkon përgjegjësi për mënyrën e menaxhimit të protestës, por edhe përgjigje nga qeveria për kërkesat e studentëve dhe qytetarëve.
