Aktorja amerikane Selma Blair është liruar me kusht pas incidentit të ndodhur në një avion, ndërsa avokatët e saj pretendojnë se ajo nuk i kishte marrë ilaçet para ngjarjes.
Sipas pretendimeve të mbrojtjes, gjendja e aktores në momentin e incidentit lidhej me faktin se ajo nuk kishte marrë medikamentet e përshkruara. Avokatët kanë kërkuar që rrethanat personale dhe shëndetësore të Blair të merren parasysh gjatë trajtimit të çështjes.
Aktorja 54-vjeçare, e njohur për rolet në filmat Cruel Intentions dhe Legally Blonde, u deklarua e pafajshme për dy akuza për sulm të shkallës së dytë. Gjykata caktoi garancinë në 20 mijë dollarë në para të gatshme ose 60 mijë dollarë në formë garancie tjetër, duke bërë të mundur lirimin e saj.
Sipas avokatëve, Blair kishte humbur disa doza të ilaçeve të përshkruara për trajtimin e sklerozës së shumëfishtë. Ata pretenduan gjithashtu se aktorja kishte punuar me orë të gjata para udhëtimit dhe se gjatë fluturimit ishte rrëzuar, duke goditur kokën. Sipas mbrojtjes, këta faktorë, së bashku me lartësinë e fluturimit, i kishin shkaktuar një gjendje të rëndë konfuzioni dhe çorientimi.
Ky nuk ishte një sulm i qëllimshëm”
-deklaroi avokati Shawn Barnes gjatë seancës gjyqësore.
Incidenti ndodhi më 11 tetor, gjatë një fluturimi të kompanisë Delta Air Lines nga Los Angeles drejt Nju Jorkut. Blair akuzohet se ka sulmuar dy anëtarë të ekuipazhit gjatë udhëtimit.
Pas uljes në aeroportin ndërkombëtar John F. Kennedy, ajo dyshohet se ka goditur edhe një punonjëse policie gjatë transportimit për në spital, si dhe një infermiere.
Përfaqësuesi i aktores deklaroi më herët se ajo kishte përjetuar një urgjencë mjekësore dhe se kishte marrë menjëherë ndihmë pas uljes së avionit. Sipas tij, gjendja e saj ishte e qëndrueshme.
Ndërkohë, incidenti po hetohet nga autoritetet federale amerikane. Blair përballet me akuza që mund të sjellin pasoja të rënda ligjore nëse shpallet fajtore, ndërsa seanca e radhës gjyqësore për çështjen në gjykatën e Nju Jorkut është caktuar për 19 janar 2027.
