Lionel Messi vazhdon të investojë në luks, por këtë herë blerja e tij e re mund të shërbejë edhe si një burim të ardhurash. Ylli argjentinas ka porositur një jaht luksoz me vlerë të përllogaritur nga 8 deri në 9 milionë euro, të cilin synon ta përdorë jo vetëm për pushimet familjare, por edhe për biznesin e dhënies me qira.
Bëhet fjalë për modelin Ultima 88, një katamaran luksoz i prodhuar nga kompania polake Sunreef Yachts. Jahti është aktualisht në ndërtim në kantierin e kompanisë në Emiratet e Bashkuara Arabe, ndërsa çmimi i saktë dhe data e dorëzimit nuk janë bërë ende publike.
Përveç përdorimit personal, mjeti lundrues pritet t’i bashkohet flotës MIM Ocean të Messit, e cila operon në bashkëpunim me kompaninë spanjolle Med Cat Yachts për dhënien me qira të katamaranëve luksozë.
Sipas raportimeve të mediave, çmimet për marrjen me qira të jahteve të kësaj flote variojnë nga 78 mijë deri në 95 mijë euro për një javë, në varësi të sezonit. Shërbimi përfshin edhe ekuipazhin, ndërsa destinacionet kryesore janë zonat turistike të Majorkës, Ibizës dhe Formenterës.
Kjo do t’i jepte futbollistit mundësinë që investimin e tij luksoz ta shfrytëzonte edhe për përfitime financiare, kur jahti nuk përdoret për qëllime personale.
Ultima 88 është projektuar për të ofruar rehati, hapësirë dhe privatësi. Jahti, me gjatësi rreth 26.8 metra, do të ketë katër kabina për mysafirët, si dhe një suitë kryesore për pronarin.
Ai do të pajiset me dy motorë, secili me fuqi prej 1 000 kuajsh, si dhe me ambiente të gjera për relaksim dhe aktivitete në det. Një hapësirë e posaçme, e njohur si “Ocean Lounge”, do të mundësojë dalje më të lehtë drejt ujit, ndërsa jahti do të ketë edhe një garazh për pajisjet e sporteve ujore.
Vetë Messi ka shprehur entuziazmin për bashkëpunimin me prodhuesin e jahteve, duke theksuar se kalimi i kohës në det është diçka që ai dhe familja e tij e kanë shijuar gjithmonë.
Është një kënaqësi e madhe për mua të bëhem pjesë e familjes Sunreef. Familja ime dhe unë gjithmonë kemi dashur të kalojmë kohë në det, sa herë që na është dhënë mundësia
-është shprehur futbollisti.
Ai shtoi se stili dhe pajisjet e modelit Ultima 88 përputhen me preferencat e tij dhe se mezi pret ta provojë jahtin së bashku me familjen.
Messi, i cili ka ndërtuar një karrierë të jashtëzakonshme në futboll dhe ka fituar shumë trofe, po zgjeron kështu edhe interesat e tij përtej fushës së lojës. Jahti i ri pritet të jetë njëkohësisht një hapësirë private për pushime dhe një aset që mund të kontribuojë në aktivitetet e tij të biznesit.
