Harry Kane ka shënuar një tjetër arritje të jashtëzakonshme në karrierën e tij, duke u futur zyrtarisht në grupin e dhjetë golashënuesve më të mirë të të gjitha kohërave në Ligën e Kampionëve.
Të lidhura
None found
Ylli anglez i Bayern Munichut tani ka shënuar 57 gola në kompeticionin më elitar evropian për klube, duke arritur kështu të njëjtin numër me ish-shokun e tij të skuadrës, Thomas Muller.
Këtë pikë referimi Kane e arriti falë dy golave të shënuar në sfidën e fundit kundër Vikingut, një paraqitje që rikonfirmoi instinktin e tij të lindur për gol.
Sipas të dhënave të publikuara nga statistikani sportiv MisterChip, sulmuesi anglez mban tashmë vendin e dhjetë në klasifikimin e përjetshëm të realizatorëve të këtij turneu prestigjioz.
Në krye të listës vijon të qëndrojë Cristiano Ronaldo me 141 gola, i pasuar nga Lionel Messi me 129 dhe Robert Lewandowski me 109.
Më poshtë renditet Karim Benzema me 90 realizime, ndërsa Raul dhe Kylian Mbappe kanë shënuar nga 71 secili.
Pjesë e kësaj liste elitare janë edhe Ruud van Nistelrooy me 60 gola, si dhe Andriy Shevchenko dhe Erling Haaland me nga 59.
Me 57 gola, Kane ka kapur Mullerin dhe po ngjitet gradualisht në një renditje që përfshin disa nga emrat më ikonë të futbollit evropian.
Kjo arritje bëhet edhe më mbresëlënëse po të kihet parasysh se pjesa më e madhe e karrierës së tij u zhvillua te Tottenham Hotspur, përpara se transferimi te Bayern Munich t’i jepte mundësinë të konkurronte vazhdimisht për trofetë më të mëdhenj në kontinent.
