Në pesë qarqe të vendit, rritja e shpenzimeve mujore të familjeve gjatë dekadës së fundit (2015-2025) nuk ka arritur të kompensojë rritjen e çmimeve, duke bërë që në terma realë familjet të shpenzojnë më pak se në vitin 2015.
Katër prej këtyre qarqeve janë në rajonin e Veriut, Lezha, Kukësi, Shkodra dhe Durrësi — ndërsa qarku tjetër është Gjirokastra.
Të dhënat zyrtare të INSTAT që burojnë nga anketa e Buxhetit te Familjeve tregojnë se nga viti 2015 deri në vitin 2025, inflacioni i akumuluar ka arritur në rreth 27.7%. Ndërkohë, në këto pesë qarqe, shpenzimet mesatare mujore të familjeve janë rritur me ritme më të ulëta se inflacioni.
Diferenca më e madhe regjistrohet në Lezhë. Në vitin 2015, një familje në këtë qark shpenzonte mesatarisht 79,374 lekë në muaj, ndërsa në vitin 2025 shpenzimet arritën në 86,935 lekë. Rritja nominale ishte vetëm 9.5%, rreth 18.2 pikë përqindje më pak se inflacioni i periudhës.
Situata është e ngjashme në Kukës, ku shpenzimet mujore të familjeve u rriten vetëm me 10.2% ndërmjet 2015-2026 ose rreth 17.5 pikë përqindje më e ulët se rritja e çmimeve.
Në Gjirokastër, shpenzimet mesatare mujore u rritën nga 74,993 lekë në vitin 2015 në 86,528 lekë në vitin 2025, ose me 15.4%. Kjo rritje mbetet rreth 12.3 pikë përqindje nën inflacionin e akumuluar gjatë dekadës.
Edhe familjet në Shkodër kanë parë një rritje të shpenzimeve dukshëm më të ngadaltë se çmimet. Shpenzimet mujore të familjeve u rriten me 17.7% në dekadën e fundit ose rreth 10 pikë përqindje më pak se inflacioni.
Durrësi është qarku i pestë ku rritja e shpenzimeve nuk ka mbajtur ritmin e çmimeve. Shpenzimet mujore të familjeve që qytetin bregdetar u rriten me 23.3% përgjatë 2015-2025 ndërsa inflacioni kumulativ në këtë periudhë ishte 27.7 5 ose , rreth 4.4 pikë përqindje më shumë se rritja e të ardhurave.
Familjet në këto qarqe shpenzojnë nominalisht më shumë lekë se në vitin 2015, por duke marrë parasysh rritjen e përgjithshme të çmimeve, fuqia reale e këtyre shpenzimeve është më e ulët se një dekadë më parë.
Në rang kombëtar, shpenzimet janë rritur më shumë se inflacioni
Tabloja në nivel kombëtar është e ndryshme. Shpenzimet mesatare mujore të një familjeje u rritën nga 70,766 lekë në vitin 2015 në 95,227 lekë në vitin 2025. Rritja prej 34.6% është rreth 6.9 pikë përqindje mbi inflacionin e akumuluar prej 27.7%.
Megjithatë, të dhënat tregojnë një diferencë të fortë mes qarqeve. Në njërin skaj është Vlora, ku shpenzimet familjare janë rritur me 69.3% në dhjetë vjet, më shumë se dyfishi i ritmit të inflacionit. Shpenzimet mesatare mujore në Vlorë u rritën nga 51,198 lekë në vitin 2015 në 86,669 lekë në vitin 2025, me një shtesë prej rreth 35.5 mijë lekësh.
Rritje dukshëm mbi inflacionin kanë shënuar edhe Elbasani, me 49.4%, Korça me 45%, Dibra me 37% dhe Tirana me 35.7%.
Në Tiranë, shpenzimet mesatare mujore të familjeve arritën në 110,904 lekë në vitin 2025, nga 81,710 lekë që ishin në vitin 2015. Kryeqyteti ka edhe nivelin më të lartë të shpenzimeve mesatare mujore në vend.
Edhe Berati, me një rritje prej 31%, dhe Fieri, me 29.8%, kanë regjistruar rritje të shpenzimeve disi më të larta se inflacioni i akumuluar./ Monitor
