Një punonjës i OpenAI është arrestuar pasi një hetim zbuloi se ai kishte vendosur fshehurazi një pajisje regjistrimi në një nga zyrat e kompanisë në San Francisko, njoftoi Departamenti Amerikan i Drejtësisë.
Ekipi i sigurisë i OpenAI e gjeti pajisjen në fund të muajit të kaluar dhe punonjësi, një shtetas saudit 35-vjeçar, u arrestua më 9 tetor, tha departamenti.
Arrestimi i Abdulrahman Alfozan ndodhi të premten, një javë pasi producenti i ChatGPT zbuloi një pajisje të fshehur regjistrimi audio në sallën e konferencave.
OpenAI kishte raportuar më parë në një postim në X se kishte zbuluar një “pajisje të sofistikuar regjistrimi të fshehur brenda njërës prej zyrave tona” dhe se ia kishte raportuar zbulimin FBI-së, e cila vazhdoi me arrestimin.
Padia e OpenAi nuk specifikon se çfarë mund të ketë pasur ndërmend të bëjë Alfozan me komunikimet e përgjuara.
Të martën, Alfozan u paraqit për herë të parë në gjykatë me akuzat për përdorim ose përpjekje për të përdorur një pajisje elektronike, mekanike ose të ndonjë pajisjeje tjetër për të përgjuar komunikimet gojore.
Sipas padisë, pajisja jashtëzakonisht e sofistikuar e regjistrimit u gjet më 30 shtator e fshehur në letër higjienike dhe e futur në një USB në pjesën e pasme të një televizori në sallën e konferencave.
Pajisja, sipas kompanisë, “ishte ndërtuar për të shmangur zbulimin, përdorte enkriptim të përparuar, mund të monitoronte audion dhe kishte një mënyrë për të transferuar të dhëna pa u vënë re”.
Sipas padisë, megjithëse salla e konferencave ku u gjet pajisja e regjistrimit nuk ishte e pajisur me kamera kur u instalua, pamjet e kamerave të sigurisë brenda zyrave të kompanisë zbuluan se Alfozan ishte pranë sallës së konferencave në gjashtë raste muajin e kaluar, pavarësisht se nuk kishte asnjë autorizim për të hyrë në atë zonë.
Kompania më vonë instaloi një kamera në dhomë, e cila, sipas FBI-së, kapi Alfozanin duke hyrë dhe duke kontrolluar pas televizorit ku ishte instaluar pajisja e regjistrimit javën e kaluar./ Corriere della Sera