Ministria e Shëndetësisë dhe Mirëqenies Sociale ka dhënë një përditësim mbi gjendjen shëndetësore të personave të lënduar gjatë protestës së djeshme të studentëve në Tiranë.
Sipas njoftimit zyrtar, në Spitalin Universitar të Traumës vijojnë të marrin kujdes shëndetësor gjashtë persona, tre kalimtarë dhe tre protestues. Të gjithë raportohen në gjendje të mirë shëndetësore, ndërsa për disa prej tyre do të vijojë qëndrimi në spital për trajtim të mëtejshëm.
Nga tre kalimtarët e lënduar, njëri po i nënshtrohet ndërhyrjes kirurgjikale, ndërsa dy të tjerët vijojnë të qëndrojnë në spital nën kujdesin e mjekëve.
Njoftimi:
Përditësim mbi gjendjen shëndetësore të personave të lënduar gjatë protestës së djeshme
Në Spitalin Universitar të Traumës vijojnë të marrin kujdes shëndetësor 6 persona të lënduar, nga të cilët:
3 kalimtarë, në gjendje të mirë shëndetësore, të cilët vijojnë qëndrimin në spital. Njëri prej tyre po i nënshtrohet ndërhyrjes kirurgjikale.
3 protestues, gjithashtu në gjendje të mirë shëndetësore. Dy prej tyre do të vijojnë qëndrimin në spital, ndërsa për personin e tretë po kryhet vlerësimi mjekësor për të përcaktuar nëse nevojitet shtrimi.
Ndërkohë, në Qendrën Spitalore Universitare “Nënë Tereza” është paraqitur gjatë natës 1 protestues me shenja intoksikimi, i cili, pas marrjes së trajtimit në urgjencë dhe rekomandimeve mjekësore, është larguar nga spitali.
Ministria e Shëndetësisë dhe Mirëqenies Sociale u uron shërim të shpejtë të gjithë personave të lënduar dhe garanton vijimin e kujdesit mjekësor sipas nevojave të secilit.
Top Channel
