Bashkimi Evropian ka reaguar pas përshkallëzimit të protestës së studentëve në Tiranë, duke shprehur shqetësim për aktet e dhunshme dhe pretendimet për përdorim të tepruar të forcës nga policia ndaj protestuesve dhe gazetarëve.
Në një reagim për News24, delegacioni i BE-së thekson se liria e tubimit dhe e shprehjes janë të drejta themelore dhe vlera thelbësore evropiane, të cilat duhet të respektohen dhe të ushtrohen në mënyrë paqësore.
“Ne shprehim shqetësim në lidhje me përshkallëzimin e dhunshëm të protestës në Tiranë”, thuhet në reagimin e delegacionit të Bashkimit Evropian.
BE-ja shprehet se është në dijeni të pretendimeve për përdorim të tepruar të dhunës nga efektivët e policisë ndaj protestuesve dhe gazetarëve, duke nënvizuar se veprimet e forcave të rendit duhet të jenë proporcionale dhe në përputhje me të drejtat themelore.
“Presim që veprimet e policisë të jenë proporcionale dhe të respektojnë të drejtat themelore, siç edhe presim që këto raste të hetohen me përparësi”, thekson delegacioni i BE-së.
Në përfundim, Bashkimi Evropian u bën thirrje të gjitha palëve të ulin tensionet, duke vënë theksin te nevoja për dialog konstruktiv mes aktorëve të përfshirë.
“Dialogu konstruktiv ndërmjet të gjithë aktorëve të përfshirë është e vetmja rrugë përpara”, përfundon reagimi i delegacionit të BE-së.
